У Асіповіцкім раёне будуюць палявыя лагеры для вагнэраўцаў. Тэлеграм-канал «Сирена» апублікаваў фотаздымкі гэтага лагеру, якія, як сцвярджаецца, зробленыя мясцовым жыхаром.
На фотаздымках бачная намёты, у якіх усталёўваюцца буржуйкі і насцілы. У адным такім намёце могуць жыць да 60 чалавек, а на ўстаноўку кожнай палаткі ідзе не больш за 30 хвілінаў.
Пры гэтым прадстаўнік ПВК Вагнэра ў размове з журналістамі, якія прадставіліся роднымі аднаго з баевікоў, сказаў, што ў Беларусі вагнэраўцаў яшчэ няма. Іншы прадстаўнік 28 чэрвеня сказаў, што база ПВК па-ранейшаму месціцца ў Краснадарскім краі на хутары Молькіна.
Раней маніторная група «Беларускі Гаюн» са спасылкай на выданне «BBC Verify» паведамляла, што пад Асіповічамі пабудаваны палявы гарадок на 8 тысяч асобаў. Імаверна, ён прызначаны для размяшчэння ПВК Вагнэра.
Напярэдадні ПВК Вагнэра праз свае каналы аб’явіла аб спыненні вярбоўкі наймітаў у сваю арганізацыю «ў сувязі з часовым няўдзелам ПВК «Вагнэр» у спецыяльнай ваеннай аперацыі і пераездам у Рэспубліку Беларусь».
Алена Рувіна belsat.eu