Міністарка замежных справаў Косава Даніка Гервала-Шварц лічыць магчымым напад Сербіі на сваю краіну. Паводле яе, паводзіны Бялграду нагадваюць паводзіны Расеі перад пачаткам агрэсіі ва Украіне. Пра гэта міністарка заявіла ў эфіры «Deutschlandfunk».
«Мова, выбар словаў, метады – усё падобна на тое, як паводзіцца ва Украіне Пуцін», – заявіла кіраўніца косаўскага МЗС.
Даніка Гервала-Шварц адзначыла, што канцэнтрацыя сербскіх вайскоўцаў уздоўж мяжы вышэйшая, чым у папярэднія гады.
«За апошнія гады ніколі не было такой канцэнтрацыі войскаў… Узбраенне, якое яны там маюць, танкі – гэта выклікае ў нас дрэннае адчуванне, бо мы не ведаем, як адрэагуе міжнародная супольнасць», – сказала яна.
Гервала-Шварц заклікала міжнародную супольнасць адказаць на гэта. У прыватнасці, замарозіць статус Сербіі як краіны-кандыдата і спыніць грашовыя выплаты. Яна таксама заявіла, што Бялград стаіць за нападам невядомых на косаўскіх паліцыянтаў 24 верасня.
У сваю чаргу прэм’ер-міністр Косава Альбін Курці заявіў, што нападнікі прайшлі падрыхтоўку на адной з ключавых базаў сербскай арміі прыкладна за чатыры дні да здарэння.
«Атакі карысталіся поўным падтрыманнем і планаваннем сербскай дзяржавы», – заявіў ён.
Паводле яго, «тэрарыстычная атака была часткай больш шырокага плану анексіі поўначы Косава шляхам скаардынаванай атакі на 37 асобных пазіцыяў». Пасля мусіў быць створаны калідор у Сербію, каб забяспечыць рух зброі і войскаў, сказаў Курці.
Прэзідэнт Сербіі Александар Вучыч наўпрост не адмаўляе, што пачаў канцэнтраваць войскі на мяжы, але зняпраўдзіў заявы аб тым, што збройныя сілы ягонай краіны пераведзеныя ў баявую гатовасць.
У ноч на 24 верасня ў вёсцы Баньска адбыўся напад на косаўскую паліцыю, у выніку чаго загінуў сяржант і быў паранены супрацоўнік памежнай паліцыі. Увечары паліцыя Косава паведаміла, што трое ўдзельнікаў нападу забітыя, яшчэ адзін арыштаваны. Пасля нападнікі заселі ў будынку мясцовага манастыра.
Якуб Хруст belsat.eu