Рада Беларускай Народнай Рэспублікі пасмяротна ўзнагародзіла беларускага ваяра палка Каліноўскага Міраслава Лазоўскага сваёй найвышэйшай узнагародай – ордэнам Жалезнага Рыцара, а мяцеж Прыгожына ў Расеі стаўся адпраўным пунктам шмат якіх падзеяў у Беларусі і вакол яе. За гэтымі ды іншымі гучнымі падзеямі разам з «Белсатам» сочыць мастак Дэ Лёс.
Адзін з лідараў «Белага легіёну» Міраслаў Лазоўскі загінуў каля Бахмуту 16 траўня. Ён быў добраахвотнікам у палку Каліноўскага, які змагаецца на баку Украіны. 25 чэрвеня Рада Беларускай Народнай Рэспублікі ўзнагародзіла яго сваёй найвышэйшай узнагародай – ордэнам Жалезнага Рыцара.
Ордэн Жалезнага Рыцара мог стаць адною з найвышэйшых узнагародаў незалежнай Беларусі, калі б тая захавала нацыянальныя сімвалы – бел-чырвона-белы сцяг і Пагоню, але гэтага не дапусціў, прыйшоўшы да ўлады, Аляксандр Лукашэнка. Міраслаў Лазоўскі стаўся першым вядомым з 1952 года кавалерам адноўленага ордэна Жалезнага Рыцара.
Увечары 26 чэрвеня прэзідэнт Расеі Уладзімір Пуцін у сваім звароце да грамадзянаў наконт сітуацыі з ПВК Вагнэра абвесціў, што Прыгожын і ягоныя найміты з’едуць у Беларусь. І тут пачалося.
Пра ўзрослую пагрозу адразу заявілі суседнія краіны – Польшча, Літва, Украіна, а эксперты пачалі выбудоўваць магчымыя наступствы для нашай краіны і асабіста Аляксандра Лукашэнкі, які дапусціў прыход у сваю краіну банды крымінальнікаў, прызнанай у свеце тэрарыстычнаю.
Потым з’явілася інфармацыя, што для размяшчэння ПВК Вагнэра ў Беларусі каля Асіповічаў ужо будуюць базу, а потым былі апублікаваныя і здымкі вялікага намётавага лагеру, у якім, паводле ацэнак адмыслоўцаў, могуць размясціцца каля 8 тысяч вайскоўцаў.
Тым часам амерыканскі Інстытут вывучэння вайны (ISW) паведамляе, што лагераў для размяшчэння байцоў ПВК Вагнэра ў Беларусі будзе тры. Пабудаваны каля Асіповічаў – толькі адзін з іх. Дзе будуць яшчэ два, пакуль невядома.
На падзеі ў Расеі падзеннем адрэагавала нацыянальная валюта гэтай краіны, а следам за ёй і беларускі рубель.
Курс амерыканскай валюты на гандляваннях Беларускай валютна-фондавай біржы працягвае рост, які пачаўся 23 чэрвеня і ўзмацніўся пасля мяцяжу Яўгенія Прыгожына ў Расеі.
30 чэрвеня долар адносна беларускага рубля падняўся на максімум за 458 дзён. Ён падаражэў на 0,01 % да 3,0319 рубля. Расейскі рубель, наадварот, упаў да мінімуму за 459 дзён. Яго курс знізіўся на 1,42 % да 3,4346 беларускага за 100 расейскіх.
28 чэрвеня Савет Міністраў РБ абнавіў забарону на завоз пэўных відаў аграпрадукцыі і ўвёў забарону на завоз з Польшчы ды Літвы піва і слабаалкагольных напояў. Урадавая прэс-служба паведаміла, што агульная прычына забароны на экспарт аграгаспадарчай і харчовай прадукцыі – недружалюбнасць краінаў яе паходжання. Аднак для забароны імпарту яблыкаў зрабілі выключэнне, іх можна будзе пастаўляць у перыяд з 1 да 31 ліпеня.
Што да забароны на завоз з Літвы ды Польшчы піва і слабаалкагольных напояў, то ён уводзіцца «з улікам вытворчасці аналагічнай прадукцыі ў Рэспубліцы Беларусь у дастатковых аб’ёмах».