1 чэрвеня 2021 года ў судзе Савецкага раёну Менску пачаўся суд над жыхаром «плошчы Пераменаў» Сцяпанам Латыпавым. Падчас разгляду справы Сцяпан паспрабаваў скончыць жыццё самагубствам.
Перад тым, як зрабіць такі адчайны ўчынак, палітзняволены звярнуўся да бацькі: «Пасля спаткання да мяне прыйшоў ГУБАЗ. Паабяцаў, што калі я не прызнаю віны, у мяне будзе прэс-хата, крымінальныя справы супраць родных і суседзяў. Прэс-хата ў мяне была – 51 дзень. Так што ты рыхтуйся». Пасля Сцяпан Латыпаў праткнуў сабе горла шарыкавай асадкай.
Пакуль медыкі спрабавалі трапіць за краты ў зале суда, мужчына ўжо страціў прытомнасць. Яго адвезлі ў лякарню і зрабілі аперацыю.
Прэс-хатай у зняволенні называецца камера, дзе адміністрацыя калоніі чыніць ціск на неўпадабаных вязняў з дапамогай іншых зняволеных, каб дэмаралізаваць іх і выбіць паказанні. Прысутныя ў судзе звярнулі ўвагу, што Латыпаў кульгаў, меў апухлы твар і сіняк пад вокам. Сам ён таксама намякаў, што зазнаваў збіццё падчас утрымання пад вартай.
Абвінавачвалі Сцяпана Латыпава паводле трох артыкулах Крымінальнага кодэксу: «Арганізацыя і фінансаванне дзеянняў, што груба парушаюць грамадскі парадак» (ч. 1 і 2 арт. 342), «Супраціўленне супрацоўніку органаў унутраных справаў» (ч. 2 арт. 363) і «Махлярства ў асабліва буйным памеры» (ч. 4 арт. 209 ). Пракурор запатрабаваў для Латыпава 8,5 года калоніі ўзмоцненага рэжыму і штраф 300 базавых велічыняў.
16 жніўня 2021 года суд вынес менавіта такі прысуд. Латыпаў не прызнаў віны ні ў адным з выстаўленых яму абвінавачанняў.
Сцяпана Латыпава затрымалі 15 верасня ў сталічнай «плошчы Пераменаў» падчас таго, як ён спрабаваў абараніць мурал з «дыджэямі пераменаў», намаляваны ў цэнтры жылога кварталу. Латыпава жорстка затрымалі і ўчынілі ператрус у кватэры. 9 месяцаў да пачатку суда мужчына заставаўся ў СІЗА.
Вядома, што пры адбыцці пакарання Сцяпан Латыпаў глытаў лязо і рэзаў вены на знак пратэсту супраць дзеянняў адміністрацыі калоніі № 22 у Івацэвічах. У верасні 2022 года палітзняволенаму замянілі рэжым на больш жорсткі і перавялі з калоніі ў магілёўскую турму № 4.
Раман Шавель belsat.eu
