За два месяцы ў «камісію па вяртанні ў Беларусь» звярнуліся 56 чалавек. Сярод іх нашая рэдактарка
Генеральны пракурор Беларусі Андрэй Швед расказаў 1 красавіка ў эфіры дзяржаўнага тэлеканалу АНТ, што ад грамадзянаў, якія хочуць вярнуцца ў Беларусь, у ягоную камісію паступіла 56 зваротаў. Камісія працуе з 6 лютага, за першы месяц у яе звярнуліся 23 асобы.
Камісія яшчэ не разглядала зваротаў, расказаў Генпракурор Андрэй Швед: матэрыялы пад першае паседжанне толькі рыхтуюць, у бліжэйшы час збіраюцца разглядзець толькі палову зваротаў.
Прынамсі адзін з 56 зваротаў – наш, ад рэдактаркі сайту «Белсату» Вольгі Ярохінай, каб праверыць, як працуе сістэма. Генеральная пракуратура не здолела даць адказ па сутнасці звароту, спаслалася на неабходнасць дапоўніць зварот неабходнымі звесткамі.
Аляксандр Лукашэнка 6 лютага падпісаў ўказ «Аб разглядзе зваротаў грамадзянаў Рэспублікі Беларусь у пытаннях учынення імі правапарушэнняў», праз месяц запусцілі сайт камісіі.
У склад камісіі разам з Генпракурорам увайшлі такія сілавікі як старшыня Камітэту дзяржаўнай бяспекі Іван Церцель і міністр унутраных справаў Іван Кубракоў; адыёзныя прапагандысты Рыгор Азаронак, Марат Маркаў, Андрэй Мукавозчык і Іван Эйсмант і іншыя.
Ва ўказе гаворыцца, што беларусы, якія жадаюць вярнуцца ў краіну праз камісію для вяртання, павінны раскаяцца, прынесці публічныя прабачэнні і пакрыць прычыненую шкоду. Ды з каментароў у дзяржаўных медыях вынікае, што па вяртанні нават праз камісію беларусаў можа чакаць зняволенне. Таксама за краты па вяртанні ў Беларусь можна трапіць і без звароту ў камісію.
Алесь Наваборскі belsat.eu
