З 6 лютага ў камісіі для вяртання з-за мяжы звярнуліся толькі 23 чалавекі. Пра гэта ў эфіры СТВ паведаміў намеснік генпракурора Аляксей Стук.
«Большасць заяў не адпавядае тым крытэрам, якія прапісаны ва ўказе, тым кірункам, звесткам, якія пазначаны, каб яны былі прадстаўленыя», – распавёў Стук.
Таму камісія пакуль і не збіралася для абмеркавання зваротаў, бо «не напрацаваны матэрыял, неабходны для абмеркавання той ці іншай заявы, звароту ад той ці іншай кандыдатуры, якая яго напісала».
Пры гэтым Стук падкрэсліў, што зварот у камісію не азначае, што «для ўсіх грамадзянаў, якія знаходзяцца там, якія звернуцца, наступіць для іх эра ўсеагульнай міласэрнасці».
6 сакавіка споўніўся месяц з таго дня, як у Беларусі пачала працу Камісія для вяртання эмігрантаў, якіх улады краіны ў лепшых традыцыях сярэднявечнага феадалізму называюць «беглымі». Цяпер запрацаваў і афіцыйны сайт камісіі, якая мае дапамагчы беларусам вярнуцца з «клубнічных плантацыяў» за мяжой. Але эфект ад яе працы ўсё адно выглядае сумнеўным.
І хоць мігрантам пры выкананні імі патрабаванняў камісіі абяцаюць адсутнасць «прэтэнзіяў аператыўнага характару», «асноўная праблема ў гэтай схеме – гэта адсутнасць даверу да праваахоўных органаў і ўладаў у прынцыпе», мяркуе палітолаг Андрэй Казакевіч.
Якуб Хруст belsat.eu