навіны

Ганна Кандраценка. Яна хацела жыць

Былая палітзняволеная Ганна Кандраценка.
Былая палітзняволеная Ганна Кандраценка. Крыніца: spring96.org
podpis źródła zdjęcia

Палітзняволеная Ганна Кандраценка памерла праз паўгода пасля вызвалення з калоніі. У яе быў рак, дыягнаставаны яшчэ падчас зняволення. Аднак дзяржава не знайшла для яе месца ў шпіталі. Гэта гісторыя пра жанчыну, якая не пагадзілася маўчаць і была пакараная не толькі турэмным тэрмінам, але і бязлітаснасцю сістэмы. Што адбылося з Ганнай і чаму ейная гісторыя – частка небяспечнай тэндэнцыі? 


Сёлета 5 лютага не стала Ганны Кандраценкі. Яна не дажыла некалькі месяцаў да 40-годдзя. За ейнаю справаю не стаялі ні гучныя лозунгі, ні вялікія структуры. Толькі каментары ў інтэрнэце. І прысуд: 3 гады зняволення і штраф, пазней яшчэ дадатковы год калоніі. І як вынік – рак.


У 2022 годзе Ганну абвінавацілі паводле трох артыкулаў Крымінальнага кодэксу за нібыта абразу Лукашэнкі, абразу прадстаўніка ўлады і суддзі. Вядома, што Ганна спадзявалася на «хімію», бо была адзінай апораю для маці-пенсіянеркі. Але яе адправілі ў 4-ую папраўчую калонію ў Гомлі.


Пазней Ганна атрымала дадатковы прысуд за яшчэ адзін стары каментар у інтэрнэце. Але новы тэрмін быў паглынуты папярэднім. Прыкладна ў гэты час у Ганны дыягнаставалі рак шыйкі маткі.

 

Васіль Завадскі, праваабаронца, установа «Дактары за праўду і справядлівасць»: 

«Ганне паставілі якраз у зняволенні гэты анкалагічны дыягназ. І казаць, што тут нехта зрабіў нешта няправільна ці правільна – бракуе інфармацыі. Але ўсе ж такі на патрабаванне нарматыўнага дакументу жанчыны раз на год павінны праходзіць агляд гінеколага. І, адпаведна, калі ёсць на тое паказанні, то і абследаванні».

Былая палітзняволеная Ірына Шчасная бачыла Ганну ў калоніі ўжо з хваробамі і сталым болем.

Ірына Шчасная, былая палітзняволеная: 

«У яе быў псарыяз. Гэта непрыемная хвароба, гэта заўжды дыскамфорт. З такою хваробаю нельга адпраўляць чалавека на швейную вытворчасць ні ў якім разе. Таму што гэта правакуе захворванне. Калі чалавек з такім захворваннем яшчэ і не атрымлівае адпаведнага лекавання, то гэта зусім ужо дрэнна».



Былыя палітзняволеныя Дар'я Афанасьева і Мія Міткевіч паказваюць сукенкі, якія яны насілі ў калоніі. 21 траўня ў Беларускім доме прайшла прэс-канферэнцыя з нагоды Дня палітвязня. Варшава, Польшча. 21 траўня 2024 года. Фота: Белсат
Былыя палітзняволеныя Дар'я Афанасьева і Мія Міткевіч паказваюць сукенкі, якія яны насілі ў калоніі. 21 траўня ў Беларускім доме прайшла прэс-канферэнцыя з нагоды Дня палітвязня. Варшава, Польшча. 21 траўня 2024 года. Фота: Белсат

Паводле іншых сведак, якія сядзелі разам з Ганнаю Кандраценкай у Гомельскай калоніі, праца швачкаю толькі пагоршыла стан псарыязу. Скура на руках была ў крыві. Акрамя гэтага, Ганну амаль пазбавілі ліставання. Пісалі ёй рэдка. У асноўным маці.


Васіль Завадскі, праваабаронца, установа «Дактары за праўду і справядлівасць»: 

«Што такое анкалогія ўвогуле? Гэта заўсёды праблемы імунітэту. Што такое імунітэт і хранічны стрэс, у якім людзі, зняволеныя адбываюць пакаранні? Гэта не тое, што не спрыяе, гэта правакуе негатыўнае развіццё анкалагічнага захворвання. То бок я вяду да таго, што ў такой сітуацыі Ганна і любая іншая жанчына з такім дыягназам павінна быць у лячэбнай установе, а не пенітэнцыярнай установе».

 

Паводле праваабарончага цэнтру «Вясна», агульная колькасць асобаў, якія за апошнія 5 гадоў сутыкнуліся з палітычна матываваным пераследам, – не меншая за 8200.


Ірына Шчасная, былая палітзняволеная: 

«Гэта ж трагедыя не толькі Ганны. Гэта трагедыя ўсіх, хто цяпер там. У нас вельмі шмат палітвязняў са станам здароўя, які наўпрост пагражае жыццю. І вельмі балюча ад таго, што мы не можам нічога зрабіць. Хутка ўжо пяць гадоў – і людзі сядзець. І гэта проста жудасна».


На сёння ў няволі застаюцца тысяча 206 асобаў, сярод іх 159 жанчын. Праваабаронцы крычаць: шмат хто з палітвязняў – у зоне высокай рызыкі, маюць інваліднасць, цяжкія хранічныя хваробы, псіхічныя разлады. Сярод вядомых палітзняволеных у трывожным для блізкіх стане застаецца інтэлектуал Аляксандр Фядута. Але ўсё часцей пра трагічны лёс вязняў мы даведаемся постфактум.


Руслан Ігнатовіч belsat.eu 


больш па гэтай тэме

Глядзіце больш
Item 1 of 4

апошнія

Item 1 of 10