20 лютага 2025 прадстаўнік Міністэрства абароны Беларусі, памочнік міністра абароны ў пытаннях міжнароднай вайсковай супрацы Валерый Равенка агучыў, што ў сярэдзіне верасня 2025 года адбудуцца супольныя з Расеяй вучэнні «Захад-2025».
Паводле Равенкі, у часе вучэнняў будуць задзеяныя больш за 13 000 вайскоўцаў. Пры такой колькасці, згодна з Венскім дакументам 2011 года, мусяць быць запрошаныя прадстаўнікі краінаў-падпісальніц. Нагадаю, што ў V раздзеле Венскага дакументу прадугледжана, што дзяржавы-ўдзельніцы мусяць паведамляць пра вучэнні не пазней як за 42 дні да іх пачатку. Гэта неабходна, калі колькасць удзельнікаў і тэхнікі перавышае пэўны ўзровень. Напрыклад, калі задзеяныя больш за 9000 асобаў, 250 баявых танкаў, 500 баявых браняваных машынаў ці 250 гарматаў. Або калі ў вучэннях бяруць удзел больш за 13 000 асобаў, 300 баявых танкаў, 500 ББМ ці 250 гарматаў.
Сапраўды, 18 сакавіка ў Менску праводзілася паседжанне кансультацыйнай групы міністэрстваў абароны РБ і РФ з адпаведнымі пытаннямі. У выніку, напрыклад Польшчы было прапанавана даслаць сваіх назіральнікаў, але таксама – даць допуск прадстаўнікам Міністэрстваў абароны Беларусі і Расеі да інспекцыі 80-кіламетровай зоны ўздоўж беларуска-польскай мяжы, каб спраўдзіць стан Узброеных сілаў Польшчы ў гэтай зоне. З паведамленняў польскай прэсы мы даведаліся, што кіраўніцтва Польшчы палічыла немэтазгодным пускаць беларускіх і расейскіх інспектараў на сваю тэрыторыю. Таксама прэса паведамляла, што назіральнікі на вучэннях «Захад-2025» усё-ткі будуць запрошаныя, але, падобна, выключна з ліку краінаў АДКБ.
З аналізу інфармацыі, даступнай нам з адкрытых крыніцаў, і сведчанняў крыніцаў унутры Беларусі, на гэтым этапе нічога не сведчыць, што вучэнні «Захад-2025» стануць «самымі буйнымі». Застаецца 4 месяцы да абвешчанага пачатку вучэнняў, але няма інфармацыі пра масавы завоз на тэрыторыю Беларусі разыходных матэрыялаў – снарадаў, набояў і гэтак далей. Нагадаю, што Беларусь не мае сваёй вытворчасці снарадаў. Больш за тое, не мае вытворчасці так званага бяздымнага пораху.
,,Тое, што было на беларускіх складах, расейцы выграблі, калі пачалі з беларускай тэрыторыі агрэсію супраць Украіны. На складах блізкай да Украіны Гомельскай вобласці, са словаў нашых сяброў, засталіся адно мінамётныя міны ды снарады для РСЗА тыпу «Град». Дагэтуль ідзе ўтылізацыя тары з-пад забранага расейцамі ўзбраення.
Падчас падобных вучэнняў «Захад-2021» Міністэрства абароны РБ рэзервавала вялізную колькасць рухомага чыгуначнага саставу (грузавыя вагоны, паўвагоны, платформы і г. д.). Сёлета такой інфармацыі няма. Больш за тое, расейцы забіралі частку сваіх зенітна-ракетных комплексаў С300 і С400, размешчаных на тэрыторыі Беларусі, назад на сваю тэрыторыю – для пільнавання паветранай бяспекі вакол Масквы напярэдадні параду 9 траўня.
Адзінае, што ўскосна можа сведчыць пра рыхтаванне чыгункі да буйных транспартаванняў, гэта замена драўляных шпалаў на бетонныя, што павялічвае дапушчальную нагрузку. Але гэтая замена можа быць і планавай, у сувязі з заканчэннем тэрміну эксплуатацыі драўляных шпалаў (праз гніенне).
,,Падсумоўваючы: пакуль няма пацверджання інфармацыі, асабліва ўкраінскіх СМІ, што вучэнні «Захад-2025» нясуць пагрозу Украіне і могуць стаць паўтарэннем вучэнняў «Захад-2021», калі расейцы завезлі свае войскі на тэрыторыю Беларусі, пакінулі іх там і ў 2022 пайшлі наступам на Украіну.
Сяргей Бульба для belsat.eu
