З нагоды 39-годдзя аварыі на ЧАЭС беларуская лідарка Святлана Ціханоўская нагадала: Чарнобыльская катастрофа зусім не такая далёкая, як можа здавацца, і сёння ўлады Беларусі ствараюць пагрозу яе паўтарэння – праз будаўніцтва атамных станцыяў з парушэннем нормаў бяспекі і размяшчэнне расейскай ядравай зброі ў нашай краіне.
Святлана Ціханоўская ў 39-ую гадавіну чарнобыльскай катастрофы ўсклала кветкі да помніку «Маці Чарнобылю» ў Вільні разам з дыпламатамі і амбасадарамі Літвы, Польшчы, Эстоніі, Іспаніі, ЗША, Харватыі, Францыі, Ірландыі, Чэхіі і Нідэрландаў.
Беларуская лідарка таксама запісала відэазварот, у якім падкрэслівае, што і праз амаль чатыры дзесяцігоддзі Беларусь адчувае наступствы катастрофы. Людзі хварэюць, а ўлады хаваюць статыстыку захворванняў і дыягназаў на забруджаных тэрыторыях.
,,«Тое самае адбывалася падчас эпідэміі ковіду 5 гадоў таму, калі ўлады заклікалі лячыцца гарэлкай, а ў той час паміралі людзі, – кажа абраная прэзідэнтка Беларусі. – Чарнобыль не такі далёкі, як можа здавацца. Рэжым сёння паводзіць сябе гэтак сама, як і савецкія ўлады падчас катастрофы. Ім прасцей змаўчаць, забыць, праігнараваць. Чарнобыль – нязручная тэма, якая руйнуе прыгожую карцінку дабрабыту і стабільнасці. Гісторыя паказвае, што дастаткова адной чалавечай памылкі ці цынічнага загаду зверху, каб гэтая афёра абярнулася трагедыяй».
Ціханоўская перакананая: «Калі б Чарнобыль выбухнуў сёння, нас чакаў бы ўсё той жа падман дзяржаўных каналаў – маўляў, ніякай пагрозы няма, а ворагі спрабуюць пасеяць паніку».
Паводле лідаркі беларускіх дэмакратычных сілаў, улады Беларусі сёння не толькі ігнаруюць пагрозы, але і ствараюць новыя:
«Атамная станцыя ў Астраўцы. Пры яе пабудове ігнараваліся і тэхнічныя стандарты, і нормы бяспекі. Колькі яна ўжо ламалася, спынялася, і колькі яшчэ трэба заключэнняў ад міжнародных экспертаў, каб зразумець, што гэтая станцыя – пагроза? І пагроза не толькі беларусам, але і нашым суседзям. Сёння рэжым кажа пра пабудову яшчэ адной станцыі, выхваляецца размяшчэннем расейскай ядравай зброі. Яе прысутнасць на нашай зямлі робіць Беларусь мішэнню, а беларусаў – закладнікамі чужога імперскага шаленства».
Кіраўніца Аб’яднанага пераходнага кабінету нагадвае: штогод 26 красавіка беларусы выходзяць на «Чарнобыльскі шлях», каб не толькі ўшанаваць памяць ахвяраў і ліквідатараў, але і сказаць не – безадказнасці і хлусні, якімі прасякнутыя як савецкі, так і цяперашні рэжым.
,,«У будучыні Беларусь станецца краінаю, дзе галоўная каштоўнасць – чалавечае жыццё. Дзе ўлады будуць служыць людзям і адказваць за свае памылкі. Дзе не будзе месца ні ядравым пагрозам, ні вайне», – рэзюмуе Святлана Ціханоўская.
26 красавіка спаўняецца 39 гадоў з аварыі на Чарнобыльскай АЭС. З 1989-га ў гэты дзень у Менску штогод праходзіў «Чарнобыльскі шлях». У выніку рэпрэсіяў, распачатых пасля прэзідэнцкіх выбараў у 2020 годзе і масавага ад’езду актыўных беларусаў за мяжу шэсце пачалі праводзіць па-за Беларуссю. У 2025-м «Чарнобыльскі шлях» адбыўся ў розных гарадах свету.
Марыя Міхалевіч belsat.eu
