Штодня ў Беларусі працягваюцца палітычна матываваныя суды і затрыманні. «Белсат» усцяж за імі сочыць.
15 красавіка праваабаронцы прызналі палітвязнямі яшчэ 7 чалавек. У спіс былі дададзеныя: Генадзь Іванчыкаў, Аляксей Семянок, Ігар Драбышэўскі, Дзяніс Белаголаў, Наталля Белакурская, Мікалай Снытко, Аляксандр Горбэль.
Усяго на гэты момант палітвязнямі ў Беларусі афіцыйна прызнаныя 1197 асобаў. Апошнім часам агульная колькасць істотна не расце і нават часам змяншаецца. Але гэта не таму, што рэпрэсіі ў Беларусі меншаюць: проста паралельна з новымі выпадкамі зняволення паводле крымінальных справаў ідзе працэс вызвалення асуджаных, якія цалкам адбылі тэрмін. Некаторых вызваляюць і па памілаваннях, хоць на іхнае месца няспынна набіраюць новых вязняў. Таксама суды некаторым прысуджаюць «хатнюю хімію», пасля чаго чалавек выходзіць з турэмных сценаў, таму больш не лічыцца вязнем.
Улады працягваюць практыку дэпартацыі палітвязняў-замежнікаў. Пасля вызвалення 54-гадовага грамадзяніна Польшчы Робэрта Тампалу, які больш за 20 гадоў жыў і працаваў у Беларусі, адразу ж даставілі пад канвоем да беларуска-польскай мяжы, дзе дэпартавалі. Афіцыйна яму забаронены ўезд у Беларусь на 8 гадоў.
Мужчыну затрымалі ў 2022 годзе. Паводле інфармацыі праваабарончага цэнтру «Вясна», мужчыну інкрымінавалі абразу Лукашэнкі (ч. 1 арт. 368 КК РБ) і абразу прадстаўніка ўлады (арт. 369 КК РБ).
Паводле «BELPOL», ён быў жанаты з беларускаю грамадзянкаю, у пары ёсць сын, народжаны ў Беларусі.
Журналісты «Белсату» знайшлі ў LinkedIn профіль Робэрта Тампалы, у якім пазначана, што ён працаваў менеджарам у агульных пытаннях у кампаніі «АрыёнСвіт», якое займалася вытворчасцю кандытарскіх вырабаў. У адкрытым доступе на сайце кампаніі звестак пра Тампалу ўжо няма.
Праваабарончаму рэсурсу «Mayday Team» стала вядома, што палітзняволеную доктарку Аляксандру Каско перавялі ў Следчы ізалятар у Баранавічах. Жыхарку Ваўкавыску затрымалі 9 лютага 2023 года пасля прыезду ў Беларусь. Дзяўчыну абвінавацілі паводле 8 крымінальных артыкулаў. 19 снежня 2023-га суддзя Гарадзенскага абласнога суда Дзмітрый Бубенчык прысудзіў Аляксандры 10 гадоў пазбаўлення волі.
Беларуская асацыяцыя журналістаў фіксуе новую хвалю рэпрэсіяў супраць журналістаў і іхных родных у Беларусі.
Паведамляецца, што ў бальшыні выпадкаў сілавікі прыходзілі паводле месца рэгістрацыі недзяржаўных журналістаў, якія цяпер вымушана працуюць за межамі Беларусі. У некаторых выпадках візіты сілавікоў суправаджаліся аглядам памяшкання ў звязку з распачатаю супраць журналіста ці журналісткі крымінальнаю справаю.
У Беларусі прызналі «экстрэмісцкім» Telegram-канал «Союз матерей Беларуси». Гаворка таксама пра чат ініцыятывы і яе лагатып. Адпаведнае рашэнне прыняў суд Ленінскага раёну Горадні 10 красавіка.
Таксама ў Спіс экстрэмісцкіх матэрыялаў дадалі:
- Telegram-каналы і чаты «EternalWar», «Syndicate_95», «Акцыi "УЛЬТЫМАТУМ"», «ГЦУ ТЭРОР»;
- Instagram-старонкі «Голос Беларуси», «ЖЫВЕ БЕЛАРУСЬ», «Суполка беларусаў Нарвегіі», «belarusy_sacramento», «Беларусы Грузии/By in Georgia (by_in_georgia)», «Крама Пагоня», «Mission of Democratic Belarus in Brussels (freebelaruseu)»;
- Сацсеткі праекту «АТЕШ»;
- YouTube-канал «Бумажные города»;
- Старонкі ў Facebook «Суполка беларусау у Iтaлii/Associazione Bielorussi in Italia», «Ультыматум да Лукашэнкi»;
- TikTok-старонкі «world_news», «Proud to be Russian-Belarusian», «Yuliya Sliuko», «Колючий LIFE», «daddytollik», «Terry Marynich», «Любитель Политики», «KIBORG28», «nexta_by», «М», «Светлана Тихановская», «pagonya», «Osint_Hanters».
Надзея Вольная / belsat.eu
