Улады Беларусі працягваюць практыку дэпартацыі палітвязняў-замежнікаў. 54-гадовы грамадзянін Польшчы Робэрт Тампала, які больш за 20 гадоў жыў і працаваў у Беларусі, быў дэпартаваны адразу пасля вызвалення з калоніі.
Робэрта Тампалу затрымалі ў 2022 годзе. Паводле інфармацыі праваабарончага цэнтру «Вясна», яму інкрымінавалі абразу Лукашэнкі паводле ч. 1 арт. 368 КК РБ і абразу прадстаўніка ўлады (арт. 369 КК РБ).
Прысуд – тры гады калоніі. Пакаранне мужчына адбываў у ПК № 1 у Наваполацку.
Вядома, што Робэрт Тампала – грамадзянін Польшчы, але з 1990-х гадоў стала жыў у Беларусі. Паводле «BELPOL», быў жанаты з беларускаю грамадзянкаю, у пары ёсць сын, народжаны ў Беларусі.
У 2023 годзе прозвішча Тампалы з’явілася ў «спісе экстрэмістаў». Журналісты «Белсату» знайшлі ў LinkedIn профіль мужчыны, у якім пазначана, што ён працаваў менеджарам у агульных пытаннях у кампаніі «АрыёнСвіт», якое займалася вытворчасцю кандытарскіх вырабаў. У адкрытым доступе на сайце кампаніі звестак пра Тампалу ўжо няма.
Як паведамляюць праваабаронцы, пасля вызвалення Робэрта адразу ж даставілі пад канвоем да беларуска-польскай мяжы, дзе яго дэпартавалі. Афіцыйна яму забаронены ўезд у Беларусь на 8 гадоў.
Сітуацыя з Робэртам Тампалам – чарговы прыклад палітычнай расправы над замежнымі грамадзянамі, якія крытычна выказваюцца пра лукашэнкаўскі рэжым або салідарныя з вольным беларускім грамадствам.
Надзея Вольная / belsat.eu
