Шэраг шырока вядомых беларускіх абрэвіятураў актыўна сустракаюцца і ў іншых краінах. Часам у вельмі нечаканых варыянтах. З нагоды 1 красавіка вырашылі паглядзець, якія новыя сэнсы беларускія назвы набываюць за межамі нашай краіны.
Яшчэ адным стаўпом беларускіх уладаў ёсць Федэрацыя прафсаюзаў Беларусі (ФПБ), якая ператварыла змаганне працоўных у падтрыманне Аляксандра Лукашэнкі. Але, напрыклад, у Афрыцы ўлады не настолькі задаволеныя арганізацыяй. Мясцовы ФПБ – гэта паўстанцкая арганізацыя Народныя сілы Бурундзі (Forces populaires du Burundi), што выступала супраць цяпер ужо былога прэзідэнта Бурундзі і супрацьстаяла войскам Дэмакратычнай Рэспублікі Конга, на тэрыторыі якога дзейнічала. Агулам абрэвіятура ФПБ распаўсюджаная даволі шырока – ад Партугальскай баскетбольнай федэрацыі (Federação Portuguesa de Basquetebol) да чэшскага панк-гурта «FPB», які грае ажно з 1980 года.
Працягваючы музычную тэму, нельга абысці ўвагай «N.R.M». – заснаваны ў 1994 годзе культавы беларускі рок-гурт, назва якога расшыфроўваецца як «Незалежная Рэспубліка Мроя». Але ў афрыканскай Угандзе папулярнасць абрэвіятуры нашмат вышэйшая, прынамсі, калі верыць афіцыйным лічбам. Там гэта кіроўная з 1986 года партыя Рух нацыянальнага супраціву (National Resistance Movement). На апошніх парламенцкіх выбарах у 2021 годзе яна атрымала 44,6 % галасоў, а ейны лідар на прэзідэнцкіх – 58,6 %. Заснаваная як ультралевая партыя здолела пераабуцца ў ультраправую, і пры гэтым няспынна заставацца ва ўладзе. Свая NRM ёсць і ў Скандынавіі – неанацысцкая арганізацыя Нардычны рух супраціву (Nordic Resistance Movement).
Што датычыць РСП, то гэта не толькі беларускі гурт «Разбітае сэрца пацана» з трасянкаўскім каларытам або японскі жаночы хіп-хоп дуэт, але і мноства палітычных Рэвалюцыйных сацыялістычных партыяў, якія ў розныя часы існавалі ва ўсім свеце, але на сёння збольшага спынілі сваю дзейнасць. Цяпер партыі з такой назвай можна сустрэць, напрыклад, у Індыі.
Важнай часткай беларускага супраціву ёсць арганізацыя «BELPOL», што аб’ядноўвае былых сілавікоў, якія перайшлі на бок беларускага народу. Але свае ўстановы з падобнай назвай ёсць, напрыклад, і ў Расеі, і ў Польшчы. Расейскі цёзка займаецца вытворчасцю хатняга тэкстылю (бялізны, посцілак, падушак, ручнікоў і іншага), а польскі – вырабляе дзверы, падлогі і займаецца іх мантажом.
Былыя калегі «BELPOL» з арганізацыі «BYPOL» таксама маюць сваіх цёзак у прамысловым сектары. Напрыклад, у Турэччыне, у правінцыі Хатай, завод з такой назвай выпускае поліпрапілен.
Пасля выбараў 2020 года ўзнік і фонд дапамогі рэпрэсаваным «BYSOL», які дапамагае, як людзям унутры Беларусі, так і тым, хто ўжо выехаў. У Гон-Конгу ж фірма «bySol-LIte» з 1989 года вырабляе сонечныя панэлі. Як кажуць, яны надзейныя, устойлівыя да ўльтрафіялету і надвор'я, а таксама тонкія, лёгкія і простыя для мантажу.
Да 2020 года важную ролю ў дэмакратычных сілах Беларусі гуляла партыя Беларуская хрысціянская дэмакратыя, якая пасля перажыла раскол. У Балгарыі БХД не звязаная ані з палітыкай, ані з хрысціянствам. Там такую абрэвіятуру мае Балгарскае хірургічнае таварыства (Българско хирургическо дружество). А вось сацыял-дэмакраты, што ў Беларусі, што ў Балгарыі – гэта БСДП. Нават і сімволіка ў іх падобная – сацыял-дэмакратычная ружа. Можна ў Балгарыі нават паслухаць БНР – Балгарскае нацыянальнае радыё. А вось у Аб’яднанай грамадзянскай партыі «калега» па АГП знайшоўся ў Казахстане – Азіяцкі газаправод, або «Asia Gas Pipeline».
Абрэвіятуру БСЖ у Беларусі маюць адразу дзве праўладныя арганізацыі – Беларускі саюз журналістаў і Беларускі саюз жанчын. А ўсё ў той жа Балгарыі БСЖ займаецца аптовым гандлем цвёрдым, вадкім і газападобным палівам і падобнымі прадуктамі.
Што датычыць праўладных партыяў, якім адзіным дазволена дзейнічаць у краіне, то пакуль Камуністычная партыя Беларусі спрабуе пабудаваць сталінізм, у Польшчы фірмы з назвай KPB займаюцца больш карыснымі справамі – будаўніцтвам жылля.
Макар Мыш belsat.eu
