навіны

Святкуйце асцярожна: 3 ліпеня ў Беларусі – рэкордная спёка

Святкаванне Дня Рэспублікі ў Горадні
Святкаванне Дня Рэспублікі ў Горадні, Беларусь. 3 ліпеня 2019 года. Фота: Grodnonews.by
podpis źródła zdjęcia

Тэмпературны рэкорд 3 ліпеня сёлета, падобна, будзе пабіты: на паўднёвым захадзе Беларусі прагназуюць да +35 °. На дзяржаўны Дзень Рэспублікі абвешчаны аранжавы ўзровень небяспекі.

Чытайце таксама:
Выезд з Беларусі ў Латвію на пункце пропуску «Грыгараўшчына», Беларусь. 2 ліпеня 2025 года. Фота: Gpk.gov.by

Лета, спёка, дзень стаяння ў чарзе. Што адбываецца на межах Беларусі

Сёлета 3 ліпеня прагназуюць надзвычайную спёку: «Белгідрамет» абвясціў аранжавы ўзровень небяспекі.


Днём 3 ліпеня на большай частцы Беларусі максімальная тэмпература паветра складзе +30..+34 °, месцамі на паўднёвым захадзе, у тым ліку ў Берасці, дасягне і +35. У Менску прагназуюць +30..+31. Паўсюль сонечна, без ападкаў і без моцнага ветру.


Імаверна, будзе пабіты тэмпературны рэкорд дня: найцяплей 3 ліпеня было ў 2016 годзе, калі тэмпература дасягала ўсяго толькі +32,1. Найхаладней было ў ноч на 3 ліпеня 1995 года, калі паветра астуджвалася да +6,3. А ў 1948 годзе ў гэты дзень выпала 40,6 мм ападкаў.


Ужо 4 ліпеня стане прахалодней: прагназуюць, што на большай частцы тэрыторыі Беларусі будзе каля +20, толькі па самым паўднёвым усходзе больш за +25. Выходныя абяцаюць быць стрымана гарачымі, але ў панядзелак, паводле папярэдніх прагнозаў, прыйдзе новая хваля спёкі – ізноў будзе паліць да +33 на поўдні.


Клімат у Беларусі, як і ўва ўсім свеце, мяняецца, тэмпературы робяцца непрадказальнымі. 3 ліпеня да Беларусі дайшла хваля спёкі, якая ўжо падсмажыла захад і цэнтр Еўропы. Прычым Беларусь – сярод еўрапейскіх краінаў, дзе найхутчэй цяплее клімат. Расце колькасць экстрэмальных з’яваў надвор’я: беларусы ўжо не так здзіўляюцца тарнада. Чэрвень у Беларусі выдаўся на 1,2 ° халаднейшым за норму і нашмат вільготнейшым ад нормы. Травень быў на 2,5 ° халаднейшы за кліматычную норму і надзвычай дажджлівы, бульба памерзла. Красавік быў цяплейшы за норму на 1,5 °, сакавік – цяплейшы на 4,4 °, люты – на 1 ° халаднейшы, студзень – аж на 5,3 ° цяплейшы. Студзень-2025 стаўся самым цёплым за гісторыю назіранняў, затое можна было хадзіць у грыбы).


У дзяржавы – свята


У Беларусі 3 ліпеня на афіцыйным узроўні адзначаюць Дзень Рэспублікі – свята ў гонар вызвалення Менску саветамі ад нацыстаў у 1944 годзе, якое з 1996 года названае Днём Незалежнасці. Аляксандр Лукашэнка запэўніваў: «Выбар даты нашага галоўнага дзяржаўнага свята гістарычна абгрунтаваны і прыняты сэрцам кожнага з нас, кожнага беларуса» (у гэтым сумняецца нават ягоная прапаганда). Беларусь – адная з нешматлікіх краінаў, у якой афіцыйны дзень незалежнасці не звязаны з незалежнасцю.


Выбраная прэзідэнтка Святлана Ціханоўская адзначыла, што ні пра якую сапраўдную незалежнасць ці свабоду ў Беларусі гаворкі не ідзе. Беларусь займае 190-е месца ў свеце паводле ўзроўню грамадзянскіх свабодаў (паміж Лівіяй і Палестынай), беларусы жывуць ва ўмовах «сапраўднай антыўтопіі», а краіна як ніколі залежыць ад Расеі.


Нягледзячы на спёку, у розных гарадах плануюць святочныя імпрэзы. Наведванне гэткіх святаў нярэдка «добраахвотна-прымусовае». На шчасце, галоўныя (але не ўсе) імпрэзы плануюць з 21:00, святочны салют у Менску абяцаюць а 23-й. Але маштабны святочны канцэрт каля Палацу спорту ў Менску пачнецца апоўдні.


Міністэрства надзвычайных сітуацыяў папярэджвае: у спёку высокая імавернасць атрымаць цеплавы ўдар, інфекцыйныя і паразітныя захворванні, абвастрэнні сардэчна-сасудзістых хваробаў; могуць быць адключэнні электрычнасці праз перагрэў, можа дэфармавацца дарожнае пакрыццё і вырасці колькасць дарожных здарэнняў, могуць пачацца прыродныя пажары.


Ратавальнікі раяць:


  • як мага менш заставацца пад наўпроставымі сонечнымі праменямі, а калі гэта непазбежна – абараняць галаву капелюшамі або парасонамі;
  • памятаць, што з 12:00 да 16:00 сонца найбольш актыўнае – у гэты час пажадана закрываць усе ўчасткі цела ад наўпроставага ўздзеяння сонца, выкарыстоўваць закрытае адзенне і сонцаахоўныя крэмы;
  • не займацца актыўным спортам пры тэмпературы, вышэйшай за +25 °;
  • купацца толькі ў спецыяльна абсталяваных і дазволеных для гэтага месцах;
  • не спажываць алкаголю, бо ў спёку яго дзеянне значна ўзмацняецца, а арганізм робіцца больш успрымальным да высокіх тэмператураў;
  • ужываць як мага больш вадкасці – прахалодную ваду або мінеральную ваду;
  • не набываць прадукты з рук, бо ў спёку бактэрыі хутка размнажаюцца, а гэта можа прывесці да цяжкіх атручванняў пры няправільным захоўванні прадуктаў;
  • не карыстацца дэкаратыўнай касметыкай або зводзіць яе выкарыстанне да мінімуму, бо скура ў спёку «дыхае» і пацее, каб астудзіць цела, а закаркаванне пораў можа прывесці да перагрэву арганізму;
  • захоўваць эмацыйны спакой, бо пераўзбуджэнне павышае рызыку цеплавога або сонечнага ўдару;
  • па магчымасці абмежаваць працяглыя паездкі на аўтамабілі, а калі гэта немагчыма — быць як мага больш уважлівымі за рулём, бо ў спёку пагаршаецца самаадчуванне, зніжаецца ўвага і рэакцыя;
  • ніколі не пакідаць дзяцей у салоне аўтамабіля без нагляду нават на кароткі час – у спёку гэта можа прывесці да страты прытомнасці.


Што трэба ведаць пра кандыцыянеры і як не галадаць у спёку – чытайце на «Белсаце».


Алесь Наваборскі belsat.eu

больш па гэтай тэме

Глядзіце больш
Item 1 of 4

апошнія

Item 1 of 10