Нацыянальны статыстычны камітэт падлічыў, колькі якіх прадуктаў харчавання куплялі беларусы ў 2024 годзе.
Як вынікае са статыстыкі, жыхары Беларусі сталі больш набываць садавіны і гародніны: на 15,7% выраслі аб’ёмы продажу свежых агуркоў, на 2,9% – свежых таматаў, на 13,5% – буракоў, на 10% – морквы, на 12,6% – яблыкаў, на 9,1% – цыбулі. Бульбы таксама беларусы летась спажывалі больш, чым годам раней – на 13,7%.
З мясных прадуктаў выраслі продажы субпрадуктаў і кансерваў. Свежага ж мяса беларусы сталі купляць менш: на 11,7% – ялавічыны, на 6,4% – свініны.
Таксама ўпалі продажы рыбы, рыбных кансерваў, ікры, ікорных вырабаў. З морапрадуктаў рост назіраецца ў спажыванні ракападобных і малюскаў – на 26,6%.
Менш таксама ў Беларусі сталі спажываць цукру – на 5,6%, крупаў: аўсянкі – на 8,6%, грэчкі – на 2,2%, рысу – на 2%, макаронаў – на 3,6%.
Адначасова беларусы сталі і менш піць гарэлку, а замест яе часцей набываюць шампанскае, каньяк і лікёры, а таксама звычайаную бутыляваную ваду.
Марыя Міхалевіч belsat.eu
