Польскі міністр замежных справаў Радаслаў Сікорскі стаў ахвярай розыгрышу расейскіх пранкераў, якія прадстаўляліся былым прэзідэнтам Украіны. Нічога сакрэтнага міністр не раскрыў, прапагандзе давялося вырываць «сенсацыі» з кантэксту. МЗС Польшчы пракаментавала здарэнне «Белсату».
Расейскія «блогеры» Ваван і Лексус (Уладзімір Кузняцоў і Аляксей Сталяроў), цесна звязаныя з расейскімі спецслужбамі, прадставіліся міністру замежных справаў Польшчы Радославу Сікорскаму як былы прэзідэнт Украіны Пятро Парашэнка. Відэазапіс размовы быў апублікаваны на іх канале ў Telegram, ён мае прыкметы мантажу – магчыма, пэўныя словы міністра выразаныя.
Расейскай прапагандзе давялося дадумаць за Сікорскім
Як паведамляе расейскае дзяржаўнае агенцтва «РИА Новости», Сікорскі падчас размовы з «пранкерамі» Ваванам і Лексусам заявіў, што цяпер Польшча нібы не мае жадання абараняць Украіну.
Насамрэч, пранкер-«Парашэнка» прасіў Сікорскага пра непасрэдны ўдзел польскіх войскаў у абароне Украіны. Сікорскі адказаў, што прэм’ер Польшчы такога не хацеў бы. Цяпер ідзе абмеркаванне, ці збіваць Польшчы расейскія ракеты над Украінай, і нават гэта вельмі спрэчнае пытанне, бо такое рашэнне можа азначаць уступленне ў вайну, расказаў Сікорскі.
А на прамое пытанне, ці значыць гэта, што Польшча не хоча бараніць Украіну, Сікорскі адказаў: «Не, вы не разумееце». Ён растлумачыў, што прысутнасці польскіх вайскоўцаў ва Украіне цяпер ніхто не хоча, але гэта можа змяніцца, калі пачне разбурацца фронт ці калі з’явяцца нейкія міжнародныя сілы кшталту міратворцаў Арганізацыі аб’яднаных нацыяў.
Сікорскі дадаў, што Польшча цалкам можа трэнаваць украінскіх вайскоўцаў, падрыхтаваць пару брыгадаў у бягучым ці наступным годзе. І перад тым расказваў, як Польшча яшчэ падтрымлівае Украіну.
Расейскія «пранкеры» таксама спыталі міністра пра падрыў газаправоду «Паўночная плынь–2».
,,«У Польшчы мы так да гэтага ставімся: хто б гэта ні зрабіў, ён зрабіў выдатную працу, – пасмяяўся Сікорскі пра падрыў газаправоду. – І цяпер мы ведаем, што амерыканцы ведалі пра гэта загадзя і не спынілі гэта».
Пранкеры пыталі і пра далучэнне Украіны да Еўразвязу, і пра спрэчкі Польшчы з Украінай у сельскагаспадарчай галіне, і пра ядравую зброю, і пра іншае. Але частку размовы пранкер-«Парашэнка» распытваў Сікорскага пра Беларусь.
Што пыталі пра Беларусь
Беларусь – што там адбываецца? Так, без удакладненняў, спытаў пранкер-«Парашэнка». Сікорскі адказаў:
«Сапраўдная праблема, што яны [улады Беларусі] выкарыстоўваюць, яны запрашаюць людзей з Афрыкі і паўднёвай Азіі ў Маскву і Менск, а потым выцясняюць іх праз мяжу, 300–400 чалавек на дзень».
Пранкер-«Парашэнка» ўдакладніў: што там з польскім суддзём? Міністр адмахнуўся: здаецца, завербавалі ўцеклага суддзю, а што паробіш, вар’яты існуюць. Суддзю, лічыць Сікорскі, чакае «жалю вартае існаванне ў Беларусі».
Спыталі і пра тое, ці можа Польшча дапамагчы беларускай апазіцыі. Міністр адказаў, што Польшча мае стасункі з беларускімі дэмакратычнымі сіламі. Але тыя, сказаў Сікорскі, «не павінны нічога рабіць заўчасна», бо «іх раздушаць»: рэжым у Беларусі рэпрэсіўны, а Расея мае ў Беларусі даўні ўплыў.
,,«Мая рабочая прапанова заключаецца ў тым, што ў Беларусі сітуацыя зменіцца толькі пасля таго, як яна зменіцца ў Расеі, а не раней», – расказаў Сікорскі.
Пранкер-«Парашэнка» спытаў: але ж шанец быў са Святланай Ціханоўскай і іншымі? Сікорскі адказаў: толькі калі б у Расеі адбылася змена ўлады. Таму Сікорскі заклікаў рыхтавацца да патрэбнага моманту.
У канцы размовы пранкер запрасіў міністра да асабістай сустрэчы, калі той будзе ў Кіеве. Сікорскі з усмешкай пагадзіўся з «Парашэнкам» словам «іншала» (إِنْ شَاءَ ٱللَّٰهُ) – па-арабску гэта азначае «калі на тое воля божая».
«Белсат» запытаў у МЗС пра гэтую размову. Вось адказ прэс-службы
«Імаверна, расейцы апублікавалі гэта, каб журналісты займаліся гэтым, а не сустрэчай міністра Радаслава Сікорскага з [дзяржаўным сакратаром ЗША Энтані] Блінкенам. Гэта смеццевая расейская прапаганда, якая павінна быць смешнай і „моладзевай“, да таго ж, мяркуючы па ўсім, датаваная сакавіком. Тут ёсць выказванні, якія міністр Сікорскі неаднаразова агучваў у розных кантэкстах».
Алесь Наваборскі belsat.eu
