За ўдзел у акцыях з бел-чырвона-белым сцягам у пенсіянеркі канфіскавалі мікрахвалёўку
На фота: Ніна Багінская на акцыі «Праспект нацыянальнага сцягу» ў Менску
З менскай кватэры 69-гадовай актывісткі Ніны Багінскай судовыя выканаўцы вынеслі бытавую тэхніку.
З менскай кватэры 69-гадовай актывісткі Ніны Багінскай судовыя выканаўцы вынеслі мікрахвалёўку і пральную машыну ў лік штрафаў за акцыі, атаксама наклалі арышт на дачныя ўчасткі актывісткі. Пра гэта паведамляе сайт «Беларускі дакументацыйны цэнтр».
«Штрафаў за ўдзел у акцыях у мяне ўжо набегла на 40 мільёнаў, на судовыя паседжанні я ўжо не хаджу – ня бачу сэнсу, навошта марнаваць час? Першы раз судовыя выканаўцы прыйшлі ў маю адсутнасць. У хаце быў сын. Яны правялі вопіс маёмасці. Я напісала заяву ў суд, што я ня згодная, бо гэта не мая маёмасць, а маіх дзяцей. У адказ атрымала звычайную адпіску, на іх думку – усё законна. Праз тыдзень прыйшлі забіраць апісанае: двое ў цывільным і двое ў форме судовых выканаўцаў. У кватэру я іх не пускала, выклікала міліцыю. Судовыя выканаўцы ўсё здымалі на відэакамеру. Прыехаў нарад міліцыі, я ім паведаміла, што мяне хочуць абрабаваць. На якой гэта падставе гэтыя людзі хочуць забраць рэчы, якія нават мне не належаць? Дзяржава рэпрэсуе мяне, дык з маёй пенсіі і вылічваецца! Пры чым тут мае дзеці, унукі і праўнукі?».
20 траўня судовыя выканаўцы і забралі з яе кватэры пральную машыну і мікрахвалевую печ.
«Але як жа так? Гэта ўсё належала маім дзецям, унукам, праўнукам. Унучка цяпер рукамі мые адзежу для майго сямімесячнага праўнука. Яны ў чым вінаватыя? Пазней я атрымала ліст пра тое, што і на мае дачныя ўчасткі накладзены арышт – у Дамашанах і Мар’інай горцы. Я рыхтую пратэст у пракуратуру», – кажа Ніна Багінская.
Сёлета актывістка атрымала чарговую судовую позву – за ўдзел у акцыі «Праспект нацыянальнага сцягу» яе будуць судзіць за «парушэнне парадку арганізацыі або правядзення масавых мерапрыемстваў» ды «непадпарадкаванне законнаму распараджэнню ці патрабаванню службовай асобы пры выкананні службовых паўнамоцтваў».
