Камісар па Еўрапейскай палітыцы суседства абмяркуе з кіраўніцтвам Беларусі і апазіцыйнымі сіламі (паасобку) стасункі Беларусі з ЕЗ, правы чалавека і рэгіянальную супрацу.
30 студзеня Беларусь наведвае Камісар па Еўрапейскай палітыцы суседства і перамовах пра пашырэнне Ёганэс Ган.
Еўрапейскі чыноўнік сустрэнецца з Аляксандрам Лукашэнкам, прэм’ерам Андрэем Кабяковым і міністрам замежных справаў Уладзімірам Макеям.
Візіт адбываецца ў межах рэалізацыі рашэнняў апошняга саміту Усходняга партнёрства.
Старонка прадстаўніцтва Еўразвязу ў Беларусі падае, што тэмаю размоваў будуць задачы, узгодненыя на брусельскім саміце.
Камісар таксама сустрэнецца з прадстаўнікамі апазіцыі і ўдзельнікамі праекту «Мост».
Паводле Гана, апошнім часам адносіны паміж ЕЗ і Беларуссю развіліся.
«Мы значна пашырылі нашую супрацу», – заявіў камісар.
«Актывізавалася супраца ў галінах, якія ўяўляюць агульны інтарэс. Еўразвяз павялічыў падтрыманне ініцыятываў па развіцці рэгіёнаў і прыватнага сектара, падтрыманне грамадзянскай супольнасці, а таксама дапамогу ў сферы энергаэфектыўнасці. Намаганні ЕЗ і надалей будуць канцэнтравацца на актывізацыі ўзаемадзеяння з усімі сегментамі беларускага грамадства. Мой візіт будзе засяроджаны на адносінах паміж ЕЗ і Беларуссю, правах чалавека, а таксама рэгіянальнай супрацы і супольна дасягнутага прагрэсу ў рэалізацыі дакументу «20 канкрэтных задач да 2020 года», закліканых забяспечыць беларускім грамадзянам адчувальныя паляпшэнні ў штодзённым жыцці», – кажа Ёханэс Хан.
Апошні раз чыноўнік наведваў Беларусь у 2015 годзе.
ДД