На парламенцкія выбары ідуць актывісты, палітыкі, журналісты і нават блогеры. Адзін з іх – Сяргей Пятрухін з Берасця, вядомы сваймі журналісцкімі расследаваннямі, перадусім карупцыі сярод чыноўнікаў, а таксама вострымі сацыяльнымі відэасюжэтамі. Аднак змаганне блогера за ўладу стала больш нагадваць гульню на выжыванне без правілаў.
Дапамагчы людзям Сяргей хоча не толькі праз агучванне іхных праблемаў у інтэрнэце. Таму пастанавіў удзельнічаць у выбарах у Палату прадстаўнікоў.
«Я прымаю ўдзел у выбарах дзеля таго, каб людзі даведаліся, каб пабачылі, што я раблю, каб людзі не баяліся і казалі праўду, каб людзі не даравалі свавольстваў чыноўнікаў і сілавікоў», – зазначае Сяргей Пятрухін, патэнцыйны кандыдат у дэпутаты.
- Улады пачалі рыхтаванні да фальсіфікацыі парламенцкіх выбараў?
- Мянчук хоча стаць дэпутатам, каб абараніць правы жанчын і легалізаваць каноплі
- Беларуска, якая сустракалася з Маргарэт Тэтчэр: яна параіла браць уладу ў свае рукі
Самыя ж чыноўнікі ды сілавікі – героі рэпартажаў Пятрухіна, – відаць, праўды яму не даруюць. Напярэдадні ўвечары да народнага рэпарцёра завіталі міліцыянты ды канфіскавалі ў яго мабільны тэлефон і ноўтбук. Свае дзеянні яны патлумачылі тым, што паводле аднаго з сюжэтаў на блогера завялі крымінальную справу.
Ці толькі рэпарцёрская дзейнасць спрычынілася да канфіскацыі?
«Можа быць гэта звязана з выбарамі, каб узбудзіць крымінальную справу супраць мяне, зрабіць мяне маргіналам на ўсё маё будучае жыццё і выкрасліць мяне, каб я больш нікуды не балатаваўся», – упэўнены Сяргей Пятрухін.
Выкрасліць прынамсі з гэтых выбараў улады хочуць і іншую прэтэндэнтку на кандыдацтва, лідарку «Маладых хрысціянскіх дэмакратаў» Марыну Хоміч. Усім без выключэння сябрам ейнай ініцыятыўнай групы патэлефанавалі чальцы камісіі 104-ай выбарчай акругі, схіляючы іх да адмовы працаваць з Хоміч.
«Незразумела нам, што гэта можа быць. Можа на гэтай акрузе балатуецца нейкі вельмі сурʼёзны праўладны кандыдат, проста яны не хочуць, каб была хоць нейкая канкурэнцыя», – мяркуе Марына Хоміч.
Здзіўляцца ж ціску на апазіцыйных прэтэндэнтаў у кандыдаты не выпадае. Аляксандр Лукашэнка яшчэ за некалькі месяцаў да старту кампаніі даў зразумець, што правілы гульні застануцца такія, як і былі апошнія 20 гадоў.
«Мы ж працуем на дзяржаву, чаго мы ў нейкую дэмакратыю незразумелую будзем гуляцца?», – выказваўся кіраўнік краіны некалькі месяцаў таму.
Апазіцыя скарыстоўвае выбарчую кампанію, каб агітаваць супраць Лукашэнкі
Застаецца гуляцца ў іншыя гульні, якія адчулі на сабе Марына Хоміч і Сяргей Пятрухін. Але іхныя ініцыятыўныя групы хаця б зарэгістравалі. Сёння ж стала вядома пра адмову ў рэгістрацыі групы лідара Менскай арганізацыі АГП Мікалая Казлова.
Алесь Яшчанка, «Белсат»
