Гісторыкі ды культуролагі працуюць над аднаўленнем ва Украінскай сталіцы надмагілля гетмана ВКЛ.
Гэтая ініцыятыва ўжо неаднаразова на працягу некалькіх дзесяцігоддзяў выказвалася як украінскімі гісторыкамі, архітэктарамі і навукоўцамі, так і прадстаўнікамі Літвы, паведамляе партал «Рідна країна». Таму, на думку грамадскасці, было б справядлівым аднавіць надмагілле князю Канстанціну Астрожскаму, якое ў XVI стагоддзі было ўсталяванае на месцы яго пахавання – у Кіева-Пячэрскай лаўры.
Для рэалізацыі гэтай задачы стварылі адмысловы Грамадскі аргкамітэт. «Рідна країна» прыводзіць словы аднаго з яго кіраўнікоў Міколы Таменкі, які ўпэўнены, што ўкраінскі бок можа знайсці агульную мову з літоўскім, і тады аднавіць надмагілле можна будзе без выкарыстання бюджэтных грошай.
Канстанцін Астрожскі (1460 – 11 верасня 1530) – дзяржаўны і вайсковы дзеяч Вялікага Княства Літоўскага, мецэнат. Найвышэйшы гетман (1497 – 1500, 1507-1530), кашталян віленскі (1511 – 1522), ваявода троцкі (1522 – 1530). Выдатны палкаводзец, пад кіраўніцтвам якога атрыманыя перамогі больш чым у 60-ці бітвах, сярод іх – бітва пад Воршаю (1514).
Пасля смерці, згодна з запаветам, яго цела пахавалі ва Успенскім саборы Кіева-Пячэрскай лаўры. Над месцам пахавання быў пастаўлены майстэрскі выкананы надмагільны манумент у стылістыцы рэнесансу з ружовага мармуру, які быў знішчаны пры выбуху Успенскага сабора ў лістападзе 1941-га.
Праектам узнаўлення Успенскага сабора, распрацаваным у канцы 1990-х гг., прадугледжвалася аднаўленне страчанага надмагілля. На жаль, гэтае праектнае рашэнне не было рэалізаванае праз брак сродкаў.
24 лістапада беларускі Нацыянальны банк выпусціў манеты памятныя манеты «Канстанцін Астрожскі» серыі «Умацаванне і абарона дзяржавы». У першы дзень іх рэалізацыі 16 снежня ля касаў Нацбанку ўтварылася вялізная чарга.
НМ, belsat.eu
