36-гадовы ветэран Нацыянальнай гвардыі ЗША Кайл Тэфэл загінуў у чэрвені. Пра смерць вайскоўца распавёў ягоны бацька.
Паводле Кевіна Тэфэла, Кайл прыехаў у Беларусь з дзвюма цёткамі. Адна з іх займалася бодыбілдынгам і ўдзельнічала ў спаборніцтвах па цяжкай атлетыцы. Кайл прыехаў, каб падтрымаць і абараніць жанчын, бо ведаў, што гэта «небяспечны раён», распавёў Fox5 бацька загінулага.
Кевін Тэфэл не называе горад і не ўдакладняе, што гэта за спаборніцтвы, але ў чэрвені ў Менску праходзіў чэмпіянат свету па паўэрліфтынгу.
Бацька салдата таксама лічыць, што ягонага сына забілі, бо напрыканцы візіту Кайл спусціўся ў казіно гатэля, у якім яны жылі. Там ён пасварыўся з ахоўнікамі, і яны прывялі амерыканца назад у нумар да цётак. Мужчына сказаў сваячкам, што ахоўнікі былі не ў сабе. Таксама ён гучаў так, нібыта баяўся за сваё жыццё. З-за страху яны забарыкадавалі дзверы, каб ніхто не мог зайсці альбо выйсці.
Як Тэфэл выйшаў з нумару, не ўдакладняецца, але праз тры гадзіны прыйшла міліцыя і паведаміла ягоным цёткам, што цела Кайла знайшлі на ходніку.
«Ягонае цела выкінулі з даху альбо з гаўбца», – сказаў Кевін Тэфэл.
Спачатку Кевін Тэфэл гаварыў, што не звязваўся з уладамі Беларусі, пазней ён заявіў, што яшчэ не атрымаў адказаў на свае пытанні ад беларускіх уладаў.
«Адказы яго не вярнуць. Адказы, пэўна, створаць яшчэ больш пытанняў», – сказаў Кевін Тэфэл WSB-TV.
Кайл Тэфэл 18 гадоў адслужыў у амерыканскай арміі. У 2005 годзе яго накіравалі ў Ірак.
5 ліпеня цела Кайла Тэфэла даставілі ў Джорджыю. Паводле вайсковай традыцыі, вайскоўца пахаваюць 7 ліпеня на Нацыянальных могілках Джорджыі.
ДР belsat.eu