Прэзідэнт Украіны Пятро Парашэнка заявіў, што размаўляць на ўкраінскай мове – гэта найлепшы спосаб яе падтрымаць.
Украінскі лідар павіншаваў суграмадзянаў з Днём украінскай мовы і пісьменства, які традыцыйна святкуюць 9 лістапада.
«Давайце любіць украінскую мову, песціць яе. Гаварыць на ёй – гэта найлепшы спосаб яе падтрымаць. Усё больш расейскамоўных падзяляе пазіцыю, на якой і я стаю, як Прэзідэнт: Адзінаю дзяржаўнаю ёсць і будзе наша ўкраінская мова», – напісаў Парашэнка на сваім профілі ў «Фэйсбуку».
[vc_single_image image=”1″ img_size=”large”]
Украінскі прэзідэнт адзначыў, што расейскую мову ва Украіне абараняюць і любяць гэтак жа мужна і палка, як і ўкраінскую.
«Пасля таго, што мы ўсе разам перажылі і перажываем у гэтым годзе, нас ужо ніхто і ніколі не падзеліць паводле моўнай прыкметы. Я, як Прэзідэнт, гэтага не дапушчу. Шчыра віншую вас з Днём украінскай мовы і пісьменства. Слава Украіне!», – завяршыў сваё прывітанне лідар Украіны.
Ва Украіне Дзень украінскай мовы і пісьменства святкуецца з 1997 года, калі гэтае свята было ўстаноўлена тагачасным прэзідэнтам Леанідам Кучмам. 9 лістапада паводле літургічнага календара Праваслаўнай царквы – дзень памяці Нестара-Летапісца – паслядоўніка творцаў славянскага пісьменства Кірылы і Мяфодзія.
МЯ, belsat.eu, паводле unian.ua
