Намеснік старшыні Партыі БНФ і ГА «БНФ «Адраджэньне» Рыгор Кастусёў заняў пасаду памочніка дэпутата Палаты прадстаўнікоў Алены Анісім, пішуць naviny.by са спасылкай на belapan.by.
«У нас супадаюць шмат у чым погляды на падзеі ў Беларусі, мне падабаецца яе пазіцыя па адраджэнні беларускіх каштоўнасцяў, пазіцыя па адраджэнню беларускай мовы, культуры. Не ўсе, вядома, атрымоўваецца зрабіць, але Анісім для гэтага прыкладае вельмі шмат высілкаў. Як я бачу, яна працуе не толькі ў сваёй акрузе, а таксама імкнецца ахапіць многія пытанні па ўсёй Беларусі », – пракаментаваў палітык.
Паводле Кастусёва, ён сам падахвоціўся стаць памочнікам дэпутата і мае намер аказваць дапамогу Анісім ў пытаннях адраджэння беларускай мовы.
Як новая пасада Кастусёва паўплывае на дзейнасць Партыі БНФ
З гэтым belsat.eu звярнуўся да лідара Патрыі БНФ Аляксея Янукевіча.
Шмат па якіх пытаннях мы супрацоўнічалі раней са спадарыняй Аленай. І тое, што спадар Рыгор стаў яе памочнікам, дасць дадатковыя магчымасці па прасоўванню беларускіх каштоўнасцяў у грамадстве.
Рыгор Кастусёў, паводле яго словаў, будзе выконваць функцыі памочніка дэпутата парламента на грамадскіх пачатках.
ВД, паводле naviny.by
