Праз будоўлю метро Менск можа пазбавіцца ўнікальнай драўлянай забудовы

video

Ужо трэцяя лінія метро пагражае помніку архітэктуры канца XIX стагоддзя.

Завулак Паўночны, Менск. Тут пакуль яшчэ захаваліся помнікі архітэктуры канца XIX стагоддзя, але ці надоўга? Дэмантаж аднаго з будынкаў пачаўся, чарга за наступнымі. Што праўда, улады супакойваюць: драўляная забудова з завулку хоць і перанясецца ў іншае месца, але застанецца такая ж, як была і дагэтуль. Тут жа прыблізна праз два гады мае паўстаць станцыя ўжо трэцяй лініі метро «Плошча Францішка Багушэвіча».

«Паводле закону «Аб ахове гісторыка-культурных каштоўнасцяў Рэспублікі Беларусь», артыкул 28, другі пункт, калі помнік архітэктуры, любая нерухомая каштоўнасць не можа быць захаваная на месцы, дзе яна «нарадзілася», яе трэба перанесці», – кажа архітэктар і рэстаўратар Уладзіслаў Рута.

Пытанне ж у тым, ці зробяць гэта якасна: ці не нашкодзіць пераезд гістарычным будынкам і ці адновяць іх менавіта ў першасным выглядзе? Наконт гэтага адмыслоўцы маюць сумневы. Не задаволеныя і жыхары, яны даўно чакалі пераезду: замест старых дамоў без выгадаў чыноўнікі ім даўно абяцалі новыя кватэры.

«Я прывозіў сюды нават міністра культуры, ён казаў, што мы тут рамёствы зробім і ўсё такое, вас адселім. А вось табе і рамёствы, і адсялілі называецца», – распавядае адзін з жыхароў.

Гэтак жа ж тут жывуць і жыхары, чыіх дамоў пераносіць не збіраюцца. З аднаго боку дваццаць першае стагоддзе, сталіца, а ўмовы, як у Сярэднявеччы.

«Людзей паставілі перад фактам: ты нікуды не ўцячэш, жыві так, як цябе прымушаюць. А так жыць горш, чым у любой самай горшай вёсцы. Абяцаюць яшчэ і калонку прыбраць», – кажа адна з жыхарак.

Таму жыхароў завулку зусім не цешыць той факт, што жывуць яны ў гістарычных дамах. Для сталічнай жа архітэктуры – страта адзінай кампактнай драўлянай забудовы была б незваротнаю. Таму важна, каб пасля пераносу яна захавалася ў тым самым выглядзе, у якім мы бачым яе сёння.

Ганна Русінава

Глядзі таксама
Каментары