Суддзя Першамайскага раёну Менску Дзмітрый Цыкал вынес апраўдальнае рашэнне па справе Рамана Пратасвеіча, хоць міліцыянты сцвярджалі, што бачылі хлопца на несанкцыянаванай акцыі.
Раман Пратасевіч сказаў, што ён у шоку, бо не чакаў апраўдання, і назваў гэта сапраўдным беларускім цудам.
«У судзе быў вельмі доўгі перапынак, я не ведаў, чаго чакаць. Было незразумела. Сёння даваць сведчанні прыйшлі два выкладчыкі. Адзінае, не ведаю, чаго цяпер чакаць ва ўніверсітэце», – каментуе Раман падчас сваёй трансляцыі ў Twitterʼы.
Раман Пратасевіч вучыцца завочна на 3 курсе журфаку БДУ.
Актывіста судзілі за абарону Курапатаў. Суд над нім пачаўся яшчэ 10 красавіка і пераносілі два разы. Нібыта ён 25 лютага а 10:00 удзельнічаў у мітынгу за абарону мемарыяла.
Аднак акурат у гэты час Раман здаваў экзамен. Хлопец прынёс у суд афіцыйнае пацверджанне ад дэкана на бланкавай паперы з пячаткай і подпісам.
Спачатку сведка-міліцынт быў упэўнены, што Раман знаходзіўся на тэрыторыі будаўнічай пляцоўкі па адрасе Мірашнічэнкі, 49 і актыўна прымаў удзел у незаконным мітынгу на фоне бел-чырвона-белых сцягоў. Больш таго, выкрыкваў лозунгі з патрабаваннем спыніць будаўніцтва ў Курапатах, а калі да яго падыходзілі з папярэджаннем, не рэагаваў.
ДР belsat.eu