Кіраўнік Расеі прызнаў таксама, што на паўднёвым усходзе Украіны адбываецца трагедыя.
Пасля анексіі Крыму і збройнага ўмяшання расейскіх вайскоўцаў у канфлікт на Данбасе, падчас якога загінулі сотні ўкраінскіх грамадзянаў, прэзідэнт РФ Уладзімір Пуцін усё яшчэ называе ўкраінцаў «самым блізкім і брацкім народам». Пра гэта ён заявіў на форуме «Россия зовёт!».
Па словах расейскага прэзідэнта, Масква «будзе садзейнічаць выхаду Украіны з палітычнага і эканамічнага крызісу».
«Мы зацікаўленыя ў тым, каб у нас быў надзейны, прадказальны партнёр-сусед. Нягледзячы на ўсю трагедыю, якую мы зараз назіраем, асабліва на паўднёвым усходзе, украінскі народ заўсёды быў і застанецца самым блізкім для нас брацкім народам», – сказаў Пуцін.
Прэзідэнт Расіі спадзяецца, што парламенцкія выбары ва Украіне пройдуць «годна», а пасля іх наступіць стабілізацыя.
«Мы зыходзім з таго, што ўсе людзі, якія пражываюць у любым кутку Украіны, будуць карыстацца поўнымі правамі, прадугледжанымі нормамі міжнароднага права і ўкраінскімі законамі», – сказаў расейскі лідар, патлумачыўшы, што гаворка ідзе аб выключэнні дыскрымінацыі паводле моўнай, этнічнай, рэлігійнай прыкметы.
«Толькі так і можна захаваць тэрытарыяльную цэласнасць краіны, толькі так можна вярнуцца да яе адзінства і забяспечыць развіццё эканомікі і сацыяльнай сферы. Мы вельмі на гэта спадзяемся і будзем усяляк гэтаму спрыяць», – запэўніў Пуцін.
За апошнія содні ў баях з тэрарыстамі і расейскімі вайскоўцамі ў Данецкай і Луганскай вобласцях загінуў адзін украінскі жаўнер і 18 атрымалі раненні.
МЯ, belsat.eu, паводле news.liga.net
