Гомельскаму журналісту даслалі пратаколы за сюжэты на «Белсаце»


Журналісту-фрылансеру Кастусю Жукоўскаму поштай даслалі два адміністратыўных пратаколы за «працу без акрэдытацыі».

Адзін з іх – за сюжэт «Пагоня цяпер – сімвал незалежнасці асобы, а не дзяржавы» – складзены маёрам Уладзімірам Паўловічам з Калінкавіцкага РАУС.

Падобны пратакол поштай даслаў і маёр Аляксандр Марозаў з Кармянскага РАУС. Гэтым разам за сюжэт «Жыхары Кармы без вады з лістападу».

«Я зʼяўляюся індывідуальным прадпрымальнікам, у якасці дзейнасці пазначыў «журналістыку». Працую ў межах закону, магу дасылаць матэрыялы, каму хачу і куды хачу – законам не забаронена», – распавядае Belsat.eu здзіўлены Кастусь Жукоўскі.

Журналіст кажа, што міліцыя топча яго права на працу і хоча пазбавіць яго і ягоных родных кавалку хлеба. Да таго ж і хлусіць, мяркуе Кастусь Жукоўскі:

«Я паведаміў міліцыянту праз тэлефон, што зʼяўляюся індывідуальным прадпрымальнікам і працую як журналіст, але ён указаў, што я не працую».

Зараз Кастусь Жукоўскі задумваецца над тым, каб скасаваць статус ІП, бо у ім «няма сэнсу». Пры гэтым адмаўляецца ад журналісцкай дзейнасці фрылансер не намераны.

Тэлефонная размова Кастуся Жукоўскага з маёрам Уладзімірам Паўловічам:

https://www.youtube.com/watch?v=kUjVWz0L-nA

НМ, belsat.eu

Глядзі таксама
Каментары