Галоўныя здымкі тыдня: ад Берлінскага муру да чарапоў-талісманаў


Нямеччына: гадавіна падзення Берлінскага муру

Дзяўчынка ўскладае кветкі да мемарыялу Берлінскай сцяны падчас цырымоніі, прысвечанай гадавіне уз’яднання Усходняй і Заходняй Нямеччыны. Берлінскі мур быў знішчаны роўна 25 гадоў таму. На час святкавання гадавіны на месцы, дзе праходзіў мур, усталявалі ліхтары. У мемарыяльных цырымоніях бяруць удзел ключавыя еўрапейскія палітыкі, а таксама тыя, хто меў уладу ў тыя часы. Гэтак, апошні кіраўнік СССР Міхаіл Гарбачоў павіншаваў немцаў ды папярэдзіў аб прывідзе новай халоднай вайны.

«Кацюша», ватнікі і воклічы «За Сталіна»: у Маскве святкуюць дзень вайсковай славы

На Краснай плошчы ў Маскве адбыўся парад, прысвечаны гістарычнаму параду ў 1941 годзе, калі савецкія жаўнеры прайшліся па галоўнай плошчы сталіцы СССР і скіраваліся наўпрост на фронт. Удзельнікі параду былі апранутыя ў гістарычныя строі, на Красную плошчу выехала тэхніка тых часоў.

Брусель пратэстуе супраць палітыкі эканоміі

Дэманстранты ў супрацьстаянні з праваахоўнікамі проста ў цэнтры Бруселю. Гэты пратэст супраць новай бюджэтнай палітыкі ўраду. Паводле розных ацэнак на вуліцы бельгійскай сталіцы выйшлі ад 120 да 160 тысячаў чалавек. Мірная маніфестацыя, аднак, скончылася закалотамі, скончылася закалотамі, у выніку якіх некалькі чалавек былі цяжка параненыя.

Беларускія камуністы святкуюць гадавіну бальшавіцкага перавароту

Сёлета на афіцыйныя ўрачыстасці пад помнік Леніну, да якога ўскладалі кветкі, сагналі вайсковых курсантаў, дзяцей, студэнтаў, працоўных заводаў і нават сяброў з Кітаю. Беларусь – адзіная краіна, якая святкуе дзень кастрычніцкай рэвалюцыі на дзяржаўным узроўні.

Першая сусветная: як гэта было

Першы ў гісторыі чалавецтва такі маштабны ўзброены канфлікт. Мільёны жаўнераў і мільёны ахвяраў. Выкарыстанне хімічнай зброі і масавыя баталіі. Рэканструктары спрабуюць аднавіць хаду тых падзеяў ды ўжыцца ў ролю шараговых жаўнераў І Сусветнай вайны. На фота – рэканструкцыя бітвы на Заходнім фронце

Чэрап прапрапрадзядулі прыносіць удачу

Гэта чарапы Паўліна і Хуаніты ў адным з балівійскіх дамоў у Дзень чэрапу, што адзначаецца амаль адразу пасля традыцыйнага Дня памерлых. І калі ў Беларусі продкаў узгадваюць у жалобным ключы, то ў Лацінскай Амерыцы гэта сапраўды – свята памерлых. Паводле традыцыяў, што налічваюць больш за 3 тысячы гадоў, людзі вераць, што ў гэты дзень душы памерлых могуць хадзіць сярод жывых ды часцяком наведваюць сваякоў. Паводле мексіканцаў і балівійцаў, бянтэжыць іх сваймі слязамі ў гэты дзень няварта – лепш узгадаць добрым словам, упрыгожыць ды выставіць на пачэснае месца сямейныя рэліквіі. Такою рэліквіяй таксама можа быць чэрап продка.

Зміцер Ягораў, belsat.eu

Глядзі таксама
Каментары