Наша краіна мае шанцы атрымаць ад Еўразвязу грошы на навуку, лічыць кіраўнік Польскай акадэміі навук (ПАН) Міхал Кляйбэр (Michał Kleiber).
Пра гэта Міхал Кляйбэр заявіў падчас візіту ў Менск на запрашэнне кіраўніцтва Нацыянальнай акадэміі навук (НАН) Беларусі. Госць наведаў Інстытут біяарганічнай хіміі, дзяржаўнае фармацэўтычнае прадпрыемства «Акадэмфарм», Інстытут мікрабіялогіі, Інстытут фізікі ды і іншыя акадэмічныя ўстановы.
Кіраўнік прэзідыума НАН Беларусі Уладзімір Гусакоў зазначыў, што структуры беларускай і польскай акадэміяў шмат у чым супадаюць. У іх прыкладна аднолькавая колькасць навуковых арганізацыяў і вучоных. Паводле яго слоў, сёння галоўныя навуковыя ведамствы Беларусі і Польшчы звязвае каля 70 сумесных праектаў у галіне гуманітарных навук, біялогіі, машынабудавання і іншых кірунках.
Міхал Кляйбэр, у сваю чаргу, заявіў, што супрацу трэба пашыраць: «Упэўнены, што вашы вучоныя шмат могуць прапанаваць як Еўрапейскаму саюзу, так і свету ў цэлым у плане развіцця навуковай сферы». Ён адзначыў, што для Беларусі цесная супраца з галоўным польскім навуковым ведамствам можа быць цікавым, таму што Польшча як чалец Еўразвязу мае доступ да навуковых даследаванняў еўрапейскага ўзроўню. Краіны ж, якія звязаны з Польскай акадэміяй навук, у сваю чаргу «таксама атрымліваюць доступ да еўрапейскага навуковага складніка ды сродкаў фінансавання па лініі ЕЗ».
Вялікі ўплыў на супрацу маюць таксама агульная гісторыя і культурная спадчына, сказаў кіраўнік ПАН.
БелаПАН
