Амерыканскі касмічны апарат «Новыя гарызонты» праляцеў міма нябеснага цела на рэкорднай адлегласці 12 500 кіламетраў. Гэткім чынам скончылася даследаванне ўсіх дзевяці «класічных» планет Сонечнай сістэмы, пачынаючы з Меркурыя.
Зонд выканаў сваю гістарычную для касманаўтыкі місію напоўніцу: зрабіў новыя фатаграфіі ды сабраў дадатковую інфармацыю пра нябеснае цела, якое некалькі гадоў таму пазбавілі статусу паўнавартаснай планеты і ўвялі новую катэгорыю карлікавых планет. «Разжалаваны» Плутон большы, чым лічылася, а таму менш шчыльны і мае цёмна-чырвоны колер – амаль як Марс.
Спрэчкі пра тое, ці лічыць Плутон планетаю, вядуцца цягам амаль дзесяці гадоў. У нябеснага цела ёсць уласцівасці, якія істотна адрозніваюць яго ад іншых: незвычайна выцягнутая арбіта, з той прычыны Плутон часамі мяняецца месцамі з Нептунам, невялікія памеры, спадарожнікі, атмасфера.
Апарат «Новыя гарызонты», які запусцілі яшчэ ў 2006 годзе, не мае тармазнога рухавіка, таму ён адправіцца далей скрозь пояс Кёйпэра да межаў Сонечнай сістэмы.
Ёсць верагоднасць, што зонд згубіцца: апарат можа сутыкнуцца з касмічным смеццем і аскепкамі лёду, што прывядзе да яго «смерці».
Навукоўцы ж упэўненыя, што вывучэнне Плутону можа праліць святло на тое,як утварыліся Зямля і Месяц ды сфармавалася Сонечная сістэма.
ДР, belsat.eu