Пад такім лозунгам Партыя БНФ абвесціла пра раздачу сшыткаў з нацыянальнаю сімволікаю. Проста ў падарунак.
АЛЯКСЕЙ ЯНУКЕВІЧ, СТАРШЫНЯ ПАРТЫІ БНФ:
“Мы хочам, каб як мага большая колькасць беларускіх дзяцей мела магчымасць пайсці ў школу, маючы вось такія сшыткі з беларускім нацыянальным арнаментам, з беларускімі нацыянальнымі сімваламі. Тут Пагоня ёсць. Каб ужо з маленства дзеці разумелі, якія сапраўдныя сімвалы Беларусі”.
Наклад сшыткаў Партыя БНФ адмыслова замовіла ў дызайнераў. Аналагічную акцыю з раздачаю ладзіць і рух “Гавары праўду!”. Толькі на сшыткі яны лепяць сваю партыйную сімволіку.
ІГАР ДРАКО, «ГАВАРЫ ПРАЎДУ!»:
“Сшыткі самі трох відаў. Там табліца множання, верш Ларысы Геніюш “Наша мова”, а таксама алфавіт”.
Яшчэ адзін апазіцыйны рух – “За свабоду” – падарыў такія ж сшыткі бацькам, якія змагаліся за беларускамоўныя класы для сваіх дзяцей.
Вучыць беларускую мову ў Дзень ведаў заклікала і магілёўская суполка Таварыства беларускай мовы разам з кампаніяй “Cukerki.by”. Валанцёры зладзілі раздачу айчынных слодычаў. Але ў абмен на веданне мовы, дакладней, за пераклад трох беларускіх словаў на расейскую.
АЛЕГ ДЗЬЯЧКОЎ, ТАВАРЫСТВА БЕЛАРУСКАЙ МОВЫ:
“Ёсць некаторыя складаныя словы, напрыклад, “відэлец” мала хто можа адгадаць. А вось “хвіліна”, “калі ласка” – гэта ведаюць амаль што ўсе, 90 %”.
Магілёўцы рэагуюць на такі вулічны конкурс станоўча.
НІНА І АЛЕНА, ВАЛАНЦЁРКІ «САЛОДКАГА ДНЯ ВЕДАЎ»:
“Асабліва моладзь. Яны заўсёды больш рэагуюць эмацыйна і пазітыўна, і з задавальненнем. І для іх няма праблемы”.
ЖЫХАРЫ МАГІЛЁВА:
“Мы ўсе словы ведалі, апроч слова “патэльня” і “кола”.
“Вавёрка” – гэта “белка”, “калі ласка” – гэта “пожалуйста”, “дыван” – гэта “ковёр”.
Так што беларуская мова можа быць не толькі мілагучная, але і салодкая.
Марцін Ярскі, “Аб’ектыў”