Жыхар Беларусі паехаў у Расеі набываць аўта, паездка скончылася трагедыяй.
У горадзе Камышын Валгаградскай вобласці яго забілі кувалдай. Забойцам аказаўся 29-гадовы мясцовы жыхар, які размясціў у інтэрнэце абвестку аб продажы аўта.
Пры гэтым аўта належала прыяцелю зламысніка, а гаспадар машыны нават не ведаў пра абвестку.
7 лютага 2016 года беларус асабіста паехаў у Камышын, каб заключыць здзелку. Прадавец і пакупнік сустрэліся ў гаражным боксе, які зламыснік арандаваў для рамонту аўтамабіляў.
Ведаючы, што пакупнік мае пры сабе вялізную суму грошай (каля 200 тыс. расейскіх рублёў альбо $ 3150), жыхар Камышына нанёс яму кувалдай некалькі ўдараў па галаве, скраў грошы, у той час як цела забітага вывез на аўце аднаго са сваіх кліентаў і схаваў на тэрыторыі закінутых могілак.
Расейскія праваахоўнікі распачалі крымінальную справу паводле артыкулаў 159 Крымінальнага кодэксу Расеі «Махлярства», 162 «Разбой, здзейснены з нанясеннем цяжкай шкоды здароўю пацярпелага» і 105 «Забойства, спалучанае з разбоем».
Падчас расследавання абвінавачаны цалкам прызнаў сваю віну.
