Заяўнікі правядзення акцыі дамовіліся пра агульны план на 25 сакавіка.
З тэксту заявы вынікае, што шэсце пройдзе праспектам Незалежнасці да Кастрычніцкай плошчы. Раней аргамітэт Дня Волі планаваў ісці да парку Янкі Купалы і не праводзіць мітынг, каб не даць уладам падстаў адправіць шэсце на плошчу Бангалор.
Прыводзім тэкст заявы ніжэй:
Улічваючы безадказнасць і грубае парушэнне заканадаўства з боку ўладаў, якія не выдалі заяўнікам у вызначаны тэрмін адказ на заяўку, аргкамітэт святкавання Дня волі, у які ўваходзяць БХД, АГП, БНФ, Рух за свабоду, Рух салідарнасці «Разам» прыняў рашэнне, што акцыя 25 сакавіка будзе праводзіцца па наступным сцэнары:
25 сакавіка 2017, 14:00 збор удзельнікаў на пляцоўцы каля Акадэміі навук, дзе адбудзецца мітынг. Далей шэсце па праспекце Незалежнасці (рух падчас шэсця па ходніках, наколькі гэта будзе магчымым, улічваючы колькасць удзельнікаў) да Кастрычніцкай плошчы, дзе праводзіцца мітынг і акцыя сканчваецца.
Улічваючы негатыўны досвед падзеяў 2010 году, любыя адхіленні ад гэтага сцэнару, у тым ліку працяг руху і выхад на плошчу Незалежнасці, з’яўляюцца небяспечнымі і безадказнымі.
Мы заклікаем праваахоўныя органы выканаць свой асноўны абавязак – забяспечыць канстутыцыйнае права грамадзянаў на правядзенне мірнай акцыі і не перашкаджаць правядзенню мірнага мерапрыемства.
У тым выпадку, калі рух будзе перакрыты, заклікаем удзельнікаў акцыі не набліжацца да кардонаў і не ўступаць у сутыкненні з супрацоўнікамі міліцыі.
Адзначым свята Дня Волі разам! Жыве Беларусь!
20 сакавіка Менгарвыканкам адмяніў сустрэчу з заяўнікамі Дня Волі. Чыноўнікі запрасілі актывістаў прыйсці наноў 22 сакавіка а 15:00. «Белсат» сочыць за сітуацыяй.
Як у Менску будуць святкаваць Дзень Волі
ДР belsat.eu
