Вядомы расейскі журналіст Павел Селін распавёў belsat.eu пра паніку, якая ахоплівае расейцаў падчас абвалу рубля.
«Сапраўды, паніка. Не масштабная, не татальная, але сярод маіх сяброў, знаёмых, калегаў адчуваецца, Зараз быў у Астанкіна, сустрэў знаёмага аператара, які вярнуўся з камандзіроўкі цалкам у разгубленасці. Пытаю, чаму такі згублены? Адказвае: «Пакуль даехаў з аэрапорту да тэлецэнтра, страціў 20 тысячаў рублёў», – распавядае тэлежурналіст Павел Селін.
Разам з тым суразмоўца belsat.eu адзначае, што ля абменнікаў ці банкаматаў велізарных чэргаў пакуль няма. Затое людзі ўкладваюць свае грошы ў тавары.
«Мая карэспандэнтка напісала сёння смс з крамы эканом-класа: «Усе ўсё змятаюць з паліцаў і я таксама». Усе, хто нешта могуць набыць, канешне, затарваюцца», – працягвае Павел Селін.
Афіцыйных тлумачэнняў расейскія ўлады пакуль не даюць. Як кажа Павел Селін, зараз усе чакаюць прэс-канферэнцыі расейскага прэзідэнта Уладзіміра Пуціна.
ЗК, belsat.eu