Анатоль Шумчанка: Заклік на «Марш пустых рондаляў» ад імя «Перспектывы» – нахабная хлусня і правакацыя

video

Анатоль Шумчанка. Фота belaruspartisan.org

Рэспубліканскае грамадскае абʼяднанне «Перспектыва» не мае ніякага дачынення да акцыі «Марш пустых рондаляў», які анансаваны ад імя гэтай арганізацыі на сайце «Беларускі партызан», заявіў старшыня «Перспектывы» Анатоль Шумчанка.

6-га студзеня «Беларускі партызан» паведаміў, што «Перспектыва» заклікае беларусаў прыйсці 16-га студзеня на Кастрычніцкую плошчу Менску на «Марш пустых рондаляў» з мэтай патрабаваць ад уладаў адмены ўказу № 222, які ўскладніў умовы працы для большасці індывідуальных прадпрымальнікаў, неадкладнай адстаўкі Аляксандра Лукашэнкі і правядзення новых сумленных выбараў.

«Публікацыя на сайце «Беларускага партызана» аб тым, што мы нібыта кагосьці кудысьці клічам, зʼяўляецца нахабнай хлуснёй і найгрубейшай правакацыяй. Ні пра што падобнае мы не заяўлялі. Ніякага дачынення да гэтага закліку ні чальцы рэспубліканскага грамадскага абʼяднання «Перспектыва», ні кіраўніцтва арганізацыі не маюць», – падкрэсліў лідар прадпрымальніцкага абʼяднання.

Па словах Шумчанкі, звязацца з адміністрацыяй інтэрнэт-рэсурсу, каб даведацца прычыны зʼяўлення гэтай публікацыі, яму пакуль не ўдалося, але ён мае намер запатрабаваць ад рэдакцыі belaruspartisan.org апублікаваць абвяржэнне гэтай інфармацыі.

https://www.youtube.com/watch?v=ntA9em0dn5A

З 1 студзеня гандляры абавязаныя прадаваць тавары лёгкай прамысловасці краінаў Мытнага саюзу толькі з дакументамі, якія пацвярджаюць іх легальнае паходжанне і бяспеку для спажыўца. Праблема ў тым, што расейскія пастаўляльнікі, у якіх набывае тавар большасць беларускіх іпэшнікаў, як правіла, адмаўляюцца выдаваць дакументы аб паходжанні вырабаў або даюць фіктыўныя даведкі.

МЯ, паводле БелаПАН

Глядзі таксама
Каментары