Грузінскі мільярдэр Бідзына Іванішвілі, што выйшаў на палітычную сцэну, каб супрацьстаяць дзейнаму прэзідэнту Міхэілу Саакашвілі, запусціў новы спадарожнікавы тэлеканал. «Channel 9» пачаў тэставую трансляцыю, якая будзе працягвацца да пачатку восені. У праграме тэлеканалу ёсць выданні навінаў і палітычныя ток-шоў.
Міжнародныя аналітыкі, у тым ліку з аўтарытэтнай арганізацыі «Freedom House», неаднаразова крытыкавалі ўрад Саакашвілі за падаўленне свабоды слова ў краіне. Паводле назіральнікаў, становішча грузінскіх медыяў адлюстроўвае палярызацыю ў грамадстве Грузіі.
Дырэктар «Channel 9» Каха Бэкауры гаворыць, што новая тэлекампанія была створаная дзеля таго, каб адкрыць для журналістаў поле для працы па-за кантролем з боку палітычных партыяў. Ён запэўнівае, што палітыкі не будуць мець уплыву на журналістаў, нягледзячы на тое, што канал фінансуецца за кошт Бідзыны Іванішвілі.
«Ён [Бідзына Іванішвілі] сам задае пытанне: навошта мне трэба запускаць чарговую прапагандысцкую тэлевізійную станцыю, калі кожны, усё грузінскае грамадства, патрабуе адказаў на тыя пытанні, што іх хвалююць. Людзям патрэбныя журналісты, якія не будуць падпарадкоўвацца ўладзе і палітычным партыям, і каб стандарты іх працы былі на высокім узроўні. Бо галоўнае – казаць праўду», – падкрэсліў Бэкауры.
Багацце Бідзыны Іванішвілі ацэньваецца на $ 6,4 млрд. Ён заснаваў у 1990 г. банк «Российский кредит» і да нядаўняга часу меў інтарэсы, звязаныя з нерухомасцю ў Маскве. Аднак алігарх заявіў, што прадаў усе свае замежныя актывы, каб засяродзіцца на палітыцы, і заснаваў палітычную партыю «Грузінская мара – дэмакратычная Грузія».
Паводле аналітыкаў, Іванішвілі ўяўляе з сябе сур’ёзную пагрозу для ўлады Саакашвілі – перадусім дзякуючы вялікім фінансавым рэсурсам і мінуламу, не звязанаму з палітычнымі махінацыямі. Акрамя таго, алігарх карыстаецца папулярнасцю дзякуючы шырокай дабрачыннай дзейнасці ў Грузіі.
У свой час улады Грузіі назвалі Іванішвілі «марыянеткаю Крамля» і пазбавілі яго грамадзянства краіны – адпаведны ўказ прэзідэнт Саакашвілі падпісаў у 2004 г. У мінулым месяцы ўлады абвесцілі, што парламент Грузіі рыхтуе канстытуцыйныя змены, якія дазволяць Іванішвілі, уладальніку пашпарта краіны ЕЗ, браць удзел у выбарах.
belsat.eu
