Дэпартамент міграцыі Літвы плануе праверыць ад 18 да 20 тысячаў грамадзянаў Беларусі, якія атрымалі від на жыхарства да таго, як Літва пачала выдаваць апытальны ліст па ўездзе ў краіну, расказала «Delfi» кіраўніца дэпартаменту.
Як растлумачыла кіраўніца Дэпартаменту міграцыі Эвеліна Гудзінскайце, Літва плануе правесці праверку грамадзянаў Беларусі, якія атрымалі віды на жыхарства на падставе працы да таго, як у 2022 годзе былі ўведзеныя абмежаванні на ўезд і запаўненне апытальнага ліста.
Яна расказала, што незапаўненне ліста «будзе расцэньвацца не на карысць асобы». Калі ў адказах будзе знойдзеная «адмоўная інфармацыя», Дэпартамент міграцыі будзе кансультавацца з Дэпартаментам нацыянальнай бяспекі. Другі можа ўказаць першаму, што чалавек ёсць «пагрозай нацыянальнай бяспецы Літвы», тады чалавека могуць пазбавіць віду на жыхарства.
Анкеты, якія ўключаюць пытанні пра анексію Расеяй украінскага Крыму і вайну ва Украіне, а таксама іншыя пытанні, беларусам з літоўскімі ВНЖ пачалі рассылаць яшчэ мінулай вясной.
Паводле звестак «Delfi», ад пачатку выдачы апытальнага ліста ў лістападзе 2022 года 1644 грамадзянаў Беларусі і 397 грамадзянаў Расеі назвалі «пагрозай нацыянальнай бяспецы». Агулам жа ў Літве пражывае каля 62,5 тысячы беларусаў.
«Сярод тых беларусаў, пражыванне якіх у Літве ўяўляе пагрозу бяспецы, каля 60 % працавалі ў сістэме МУС або дзяржаўных установах, каля 30 % – служылі ва ўзброеных сілах РБ, каля 10 % – працавалі ў вайсковай прамысловасці або на іншых стратэгічных аб’ектах», – адзначалі раней у літоўскім Дэпартаменце дзяржаўнай бяспекі.
Разам з тым Дэпартамент адмаўляецца каментаваць, якім чынам былы беларускі міліцыянт Аляксандр Маціевіч, што браў удзел у задушэнні пратэстаў 2020 года, атрымаў ВНЖ у Літве.
А беларусы расказваюць, што іх называюць «пагрозай дзяржаўнай бяспецы» Літвы нават за тэрміновую службу ў войску (якая ў Беларусі абавязковая для мужчынаў, у адрозненне ад добраахвотнай кантрактнай) або за працу на БелАЭС.
«За апошнія некалькі месяцаў маштабы прытоку грамадзянаў Беларусі ў Літву крыху зменшыліся, гэта значыць тэмпы, іх прыросту ў Літве крыху замарудзіліся, калі параўноўваць з пачаткам мінулага года, – расказала Гудзінскайце LRT. – Я думаю, што гэта звязана з усім становішчам і з тым, што бізнес, перш за ўсё, пераарыентуецца і пачынае запрашаць працоўную сілу з іншых краінаў, якія не ўяўляюць такіх вялікіх рызык, напрыклад, Узбекістан, Кіргізія, Казахстан».
Літва таксама мае закрыць яшчэ два пераходы на мяжы з Беларуссю, плануе значна скараціць колькасць дазволаў на пасажырскія перавозкі з Беларусі, разглядае прапанову падоўжыць і ўзмацніць санкцыі супраць беларусаў, хоча пазбаўляць дазволу на жыхарства беларусаў, якія ездзяць на радзіму часцей за раз на месяц, а ў літоўскіх дзяржаўных медыях з’яўляюцца заклікі паказаць, што беларусам у Літве «не радыя».
Алесь Наваборскі belsat.eu