Каталікі, пратэстанты, уніяты і шэраг праваслаўных святкуюць сёння Раство. «Штогадовае святкаванне ўрачыстасці Божага Нараджэння – гэта святло для народаў, для супольнага шляху чалавецтва», – гаворыцца ў пасланні мітрапаліта Менска-Магілёўскага Іосіфа Станеўскага.
Упершыню сёлета ва Украіне праваслаўныя і ўніяты афіцыйна святкуюць Раство «па-новаму» – 25 снежня. Рашэнне ўхвалілі і зацвердзілі на царкоўным і дзяржаўным узроўнях: з 1 верасня Праваслаўная царква Украіны і Украінская грэка-каталіцкая царква адзначаюць царкоўныя святы паводле новаюліянскага календара.
Раство сёння святкуе бальшыня хрысціянаў свету.
З увагі на вайну паміж Ізраілем і «Хамасам» Бэтлеем на Заходнім беразе Іярдану, які заўжды поўніўся вернікамі і турыстамі, сёлета незвычайна пусты. Каля Базілікі Нараджэння Хрыстова ціха і нялюдна.
«Штогадовае святкаванне ўрачыстасці Божага Нараджэння – гэта святло для народаў, для супольнага шляху чалавецтва. Вера ў Бога, які пажадаў падзяліцца з намі сваёй любоўю, пастаянна заахвочвае нас да ўдзелу ў гэтай Божай гісторыі збаўлення. Давайце разам сузіраць гэтую вялікую таямніцу любові; няхай нашыя сэрцы будуць асветленыя святлом, якое ззяе ў бэтлеемскіх яслях. Няхай святло Божага Нараджэння зноў заяснее і натхніць нас да пошукаў справядлівага і мірнага суіснавання», – адзначыў у сваім пасланні мітрапаліт Менска-Магілёўскі Іосіф Станеўскі.
Беларусаў, якія святкуюць Каляды 25 снежня, павіншавала абраная прэзідэнтка Святлана Ціханоўская:
«Сёння па ўсім свеце згадваецца звычай дзяліцца аплаткай – кавалачкам хлеба, які перадаецца з рук у рукі. Такім чынам людзі выказваюць падтрымку і клопат, дзеляцца цеплынёй і любоўю. Але мы, беларусы, бескарысліва дзелімся ўсім гэтым не толькі на Каляды, але кожны дзень». Яна пазычыла «міра, дабра і святла, якое не дазволіць змроку захапіць нашыя сэрцы».
Пра спагаду і любоў да бліжняга згадаў у віншаванні Аляксандр Лукашэнка, пад кіраўніцтвам якога чацвёрты год не спыняюцца маштабныя рэпрэсіі ў Беларусі:
«Яркае святло бэтлеемскай зоркі кліча ўсіх вернікаў насустрач самаму цудоўнаму хрысціянскаму святу. Яно напаўняе сэрца вялікай радасцю і надзеяй, натхняе на добрыя справы, вучыць праяўляць спагаду і любоў да бліжняга». Лукашэнка назваў Каляды часам «душэўных сямейных вечароў, доўгачаканых дзіцячых падарункаў і ўсвядомленай дабрачыннасці».
«Перакананы, аб’яднаныя вернасцю да сваёй роднай Беларусі, разам мы зробім усё магчымае, каб кожны яе жыхар адчуваў сябе запатрабаваным і шчаслівым», – заявіў палітык.
Сёння ў Беларусі працягваюцца святочныя набажэнствы, што пачаліся яшчэ напярэдадні. Службы будуць ісці да самага вечара.
Сцяпан Кубік belsat.eu