Прэзідэнт ЗША Джо Байдэн падчас сваіх паездак па краіне назваў прэзідэнта Расеі Уладзіміра Пуціна «звар’яцелым сукіным сынам». Пра гэта паведамляе CNN.
«Ёсць звар’яцелы сукін сын – той хлопец, Пуцін, ды іншыя. І мы заўсёды мусім баяцца ядравага канфлікту», – сказаў Джо Байдэн.
Байдэн таксама раскрытыкаваў каментары экс-прэзідэнта Доналда Трампа, які параўнаў свае праблемы з законам са смерцю ў вязніцы расейскага апазіцыянера Аляксея Навальнага.
«Ён параўноўвае сябе з Навальным і кажа, што, паколькі нашая краіна зрабілася камуністычнай краінай, яго пераследавалі гэтак жа, як пераследавалі Навальнага. Адкуль, чорт вазьмі, гэта ўзялося?» – сказаў Байдэн.
Былы амерыканскі прэзідэнт і імаверны кандыдат на выбарах 2024 года Доналд Трамп выступіў з рэзкай крытыкай саюзнікаў з NATO. Ён заявіў, што Злучаныя Штаты не будуць абараняць саюзнікаў ад Расеі, калі чальцы NATO будуць выдаткоўваць на абарону менш як 2 % ад ВУП.
«Насамрэч я заахвочваў бы іх [Расею] рабіць усё, чаго яны, трасца, захочуць», – зазначыў Трамп.
Якуб Хруст belsat.eu
