У будынак Капітолію ў ЗША 18 кастрычніка прарваліся пратэстоўцы, якія патрабавалі неадкладнага спынення агню ў сектары Газа і спынення вайсковай дапамогі Ізраілю. Праз некаторы час паліцыя выцесніла ўсіх дэманстрантаў з Капітолію і затрымала каля 300 чалавек, паведамляе «ABC News».
Паведамляецца, што дэманстранты былі арганізаваныя леваю габрэйскаю групаю «Габрэйскі голас за мір» («Jewish Voice for Peace»), якая прытрымліваецца прапалестынскай пазіцыі, выступае за спыненне агню ў сектары Газа і спыненне вайсковай дапамогі Ізраілю.
Пратэстоўцы ўварваліся ў будынак Капітолію падчас паездкі прэзідэнта ЗША Джо Байдэна ў Ізраіль і на фоне бамбавання шпіталю ў Газе. Яны абвінавачваюць Байдэна ў тым, што ён дае Ізраілю карт-бланш на любыя дзеянні і не жадае асудзіць тое, што прыводзяць да ахвяраў сярод мірнага насельніцтва Газы.
«Мы ўсе тут, каб запатрабаваць спынення генацыду палестынскага народу, да якога падбухторвае ўрад ЗША», – заяўлялі ўдзельнікі пратэсту.
Паводле прэс-сакратара паліцыі, некаторыя з пратэстоўцаў увайшлі ў офісны будынак у розных пунктах бяспекі і пасля сабраліся разам. Пратэстоўцы, як і астатняя грамадскасць, могуць легальна ўваходзіць у комплекс Капітолію і заставацца там толькі ў тым выпадку, калі яны не выклікаюць беспарадкаў, дадаў прэс-сакратар паліцыі.
Падчас акцыі да ўдзельнікаў пратэстаў у падтрыманне Палестыны ў Капітоліі выйшаў часовы спікер палаты прадстаўнікоў ЗША Патрык МакГэнры. У яго ў руках быў сцяг Ізраілю, які палітык выставіў перад мітынгоўцамі.
У выніку каля 300 чалавек былі арыштаваныя паліцыяй Капітолію.
Мітынгі ў падтрыманне Палестыны вечарам 18 кастрычніка прайшлі таксама ў Берліне, ля ізраільскага консульства ў Стамбуле, у Афінах, Бахрэйне і Барсэлоне.
Алена Рувіна belsat.eu
