У свеце ёсць 4 прэстыжныя конкурсы прыгажосці: «Miss World», «Miss Universe», «Miss International» i «Miss Earth». У Беларусь жа пераехаў конкурс «Miss Supranational», але ці ёсць чым ганарыцца?
«Miss Supranational»
Гэты конкурс зусім малады – ён нарадзіўся ў 2009 годзе. Яго арганізоўвае «World Beauty Association», заснаваная ў Панаме. Да 2012 года праводзіўся ў Польшчы. На 2013 год арганізатары падпісалі ўмову з Беларуссю. Матывавалі гэта тым, што цяперашняя «Miss Supranational» Кацярына Бурая – нашая суайчынніца.
Сёлетні фінал – 6 верасня. Дарэчы, у Менск прыехала болей за 100 удзельніц, летась у Варшаве іх было 53. Конкурс прыцягнуў увагу медыяў, яшчэ не распачаўшыся: падчас шпацыру па беларускай сталіцы прадстаўніца Гвадэлупы Эладзі Одадан страціла прытомнасць. Беларусь рэпрэзентуе 17-гадовая студэнтка Беларускага дзяржаўнага ўніверсітэту транспарту (Гомель) Вераніка Чычына.
«Miss World»
Самы стары з раскручаных конкурсаў прыгажосці – «Miss World» са штаб-кватэраю ў Лондане. Упершыню прайшоў у 1951 годзе як конкурс дзяўчат у бікіні – цяперашнюю назву прыдумалі журналісты, пасля яна замацавалася. Таму адзетую ў мінімалістычны купальнік пераможцу каранавалі толькі аднойчы. У 1980-я журы пастанавіла, што ўдзельніцы мусяць апрача вонкавых дадзеных дэманстраваць свае таленты і адукаванасць.
Цяперашняя «Miss World» – кітаянка Юй Ўэнь Ся. Паводле традыцыі, пераможца цягам года жыве ў Лондане і падарожнічае па свеце з дабрачыннаю місіяй. Штогадовыя фіналы праводзяцца пад эгідаю арганізацыі «Miss World Organization», якая з 1951 года патраціла 250 млн фунтаў стэрлінгаў на дзіцячую дабрачыннасць. Фірма «Miss World, Limited» мае франшызы больш як у 100 краінах. Яе выдаткі і прыбыткі – камерцыйная таямніца. Арганізацыя спрычынілася да ўсплёску турызму ў кітайскі горад Сань-Я, дзе адбыліся фіналы 2003, 2004, 2005, 2007 і 2010 гадоў.
Сёлетні фінал пройдзе 28 верасня ў Інданезіі. Беларусь прэзентуе 22-гадовая студэнтка Віцебскай дзяржаўнай акадэміі ветэрынарнай медыцыны Марыя Вялічка.
{movie}Беларусь на «Miss World – 2013» прадстаўляе Марыя Вялічка|right|12286{/movie}
«Miss Universe»
Праз год пасля брытанскага «Miss World» у Каліфорніі стартаваў амерыканскі «Miss Universe». Яго пачатак таксама звязаны з купальнікамі. Рэч у тым, што «Міс Амерыка–1951» Ёўландэ Бэтбэзэ адмовілася пазаваць у бікіні ад галоўнага спонсара. Кампанія абразілася і заснавала адразу два канкурэнтныя конкурсы: «Miss USA» і «Miss Universe». У 1952 годзе «Miss Universe» стала фінка Армі Куусела, якая адмовілася ад тытулу, калі ганаровы год ужо сканчаўся, каб выйсці замуж.
З 1998 года конкурс праводзіць «Miss Universe Organization», якая мае штаб-кватэру ў Нью-Ёрку і ладзіць таксама два іншых конкурсы: «Miss USA» i «Miss Teen USA». Цяпер тытул «Miss Universe» носіць амерыканка Алівія Калпа. Сталіцаю сёлетняга фіналу, які пройдзе 9 лістапада, будзе Масква.
«Miss International»
Амерыканскія карані мае і «Miss International» («Miss International Beauty» або «The International Beauty Pageant»), які пачалі праводзіць з 1960 года, пасля таго, як «Miss Universe» змяніў дыслакацыю з Каліфорніі на Маямі. З 1970-х праходзіць у Токіа. Ад удзельніц апрача прыгажосці чакаюць далікатнасці, сардэчнасці і дабрыні, інтэлігентнасці, актыўнасці і талерантнасці ў адносінах да прадстаўнікоў іншых нацыянальнасцяў.
Прадстаўніцаю Беларусі на «Miss International–2012» была Настасся Пагранічная. Фота livewireworld.info«Miss International–2012» стала японка Ікумі Ёсімацу. Рэпрэзентавала Беларусь тады нарадзінка Жодзіна 21-гадовая Настасся Пагранічная. Сёлетні фінал запланаваны на кастрычнік.
«Miss Earth»
Конкурс заснавалі ў 2001 годзе, каб прыцягнуць увагу сусветнай супольнасці да праблемаў навакольнага асяроддзя. Штаб-кватэра месціцца на Філіпінах. Пераможца атрымлівае статус спікера экалагічных арганізацыяў, сярод якіх «Miss Earth Foundation» і «United Nations Environment Programme», «Green Peace» i «World Wildlife Foundation» і супрацоўнічае з міністэрствамі краінаў-удзельніц. З 2008 года ў межах конкурсу праводзіцца спаборніцтва паміж дызайнерамі экалагічнай моды.
У 2003 годзе конкурс прыцягнуў увагу медыяў па ўсім свеце, калі прадстаўніца Афганістану з’явілася на подыуме ў чырвоным бікіні, за што яе, вядома, асудзілі суайчыннікі. У 2012 годзе «Miss Earth» стала чэшка Тэрэза Файксава. Сёлетні фінал пройдзе ў снежні.
Аліна Кашкевіч, belsat.eu