Адміністрацыя калоніі прыдумвае ўсё новыя метады ціску на актывістку Паліну Шарэнда-Панасюк, якая не прызнае гэтую ўладу і лічыць сябе захопленай у палон.
З ліста, які атрымала маці Паліны, стала вядома, што адміністрацыя калоніі пазбавіла яе харчовых перадачаў на 3 месяцы. Такім чынам, Паліна ня зможа атрымаць дазволеную прадуктовую пасылку амаль да Новага году.
Таксама стала вядома, што адміністрацыя калоніі абмежавала для Паліны закупы ў турэмнай краме ў тры разы: замест дазволеных 174 рублёў ёй можна закупіць прадукты і рэчы толькі на 58 рублёў. Зразумела, што за гэту суму нельга набыць нават мінімум ад неабходнага. Адказным за ўсе гэтыя дзеянні з’уяўляецца начальнік гомельскай ПК-4 Дзяніс Таўсцянкоў, – заявіў у размове з «Белсатам» муж жанчыны Андрэй Шарэнда.
Паліна ў лісце сваякам пракаментавала гэта так: ну нічога, пахудзела. Таксама палітвязняволеная піша, што не збіраецца здавацца.
За кратамі Паліна знаходзіцца ўжо 315 дзён. Суд Маскоўскага раёну Берасця 9 чэрвеня прызначыў 2 гады калоніі Паліне Шарэндзе-Панасюк. Яе прызналі вінаватай адразу паводле трох артыкулаў Крымінальнага кодэксу: «Абраза прэзідэнта» (арт. 368), «Абраза прадстаўніка ўлады» (арт. 369) і «Гвалт або пагроза ўжывання гвалту ў дачыненні супрацоўніка органаў унутраных справаў» (арт. 364).
АЛ, belsat.eu
