Затрыманы кіраўнік ОАО «Бярозаўскі мясакансервавы камбінат» Уладзімір Жуковіч. Магчымая прычына – хабар ад дылера прадукцыі завода. Пра гэта паведамляе «Наша Ніва».
Камбінат з’яўляецца адным з буйнейшых прадпрыемстваў мясаперапрацоўчай галіны Беларусі. Уладзімір Жуковіч кіраваў ім больш за дзесяць гадоў. На сайце камбіната ён усе яшчэ пазначаны як дырэктар.
У кастрычніку 2022 года ў прадпрыемства ўжо былі праблемы з сілавікамі. Тады была распачатая крымінальная справа за службовую халатнасць супраць аднаго з працаўнікоў за «неабгрунтаванае прадастаўленне гандлёвым сеткам скідак». Па версіі КДК, праз гэта камбінат страціў больш за 500 тысяч рублёў.
Жуковіч мае званне «Заслужаны працаўнік сельскай гаспадаркі Рэспублікі Беларусь» і медаль «100 год органам дзяржаўнага кіравання сельскай гаспадаркай і харчаваннем Беларусі».
Арсен Рудэнка belsat.eu
