Вярхоўны Суд на пазоў Міністэрства юстыцыі зліквідаваў Партыю БНФ, паведамляе «Sputnik. Беларусь». У партыі заявілі, што знішчэнне арганізацыі «не азначае спынення руху грамадства, бо немагчыма спыніць ідэю, час якой настаў».
У Міністэрстве юстыцыі заявілі толькі, што «суд задаволіў пазоў аб ліквідацыі Партыі БНФ». Імаверна, падставаю сталася тое, што палітычная арганізацыя не скіравала дакументаў на перарэгістрацыю.
У заяве Партыі БНФ, якую атрымаў «Белсат», адзначаецца, што згодна з абноўленым Законам аб палітычных партыях арганізацыі мусяць «забяспечваць выкананне асноўных кірункаў унутранай і вонкавай палітыкі, канцэпцыі нацыянальнай бяспекі, якія зацвярджаюцца Усебеларускім народным сходам».
«Партыя БНФ не мела ані палітычнага права, ані юрыдычных магчымасцяў прывесці сваю ідэалогію, праграму і практычную праграмную дзейнасць у адпаведнасць з новым законам і падпарадкавацца гэтаму патрабаванню для мэты перарэгістрацыі», – адзначаецца ў заяве.
Актывісты канстатавалі, што новы закон фактычна забараняе аб’яднанні, якія не падтрымоўваюць цяперашняга палітычнага курсу кіраўніцтва краіны і маюць іншае бачанне беларускай будучыні.
«Рашэнне Вярхоўнага Суда аб ліквідацыі Партыі БНФ не азначае спынення руху грамадства да прыняцця і пашырэння нацыянальна-дэмакратычных каштоўнасцяў, бо немагчыма спыніць ідэю, час якой настаў», – падсумавалі ў Партыі БНФ.
Партыю ў 1993 годзе заснаваў Зянон Пазняк. Цяперашні старшыня арганізацыі – Рыгор Кастусёў – за кратамі паводле абвінавачання ў спробе дзяржаўнага перавароту. Летась палітыку прысудзілі 10 гадоў калоніі.
Апошнім часам у Беларусі зліквідавалі шэраг партыяў, у тым ліку «Зялёныя», Беларускую сацыял-дэмакратычную Грамаду, Кансерватыўна-хрысціянская партыю БНФ.
15 жніўня Вярхоўны Суд разгледзіць пазоў Міністэрства юстыцыі аб ліквідацыі Аб’яднанай грамадзянскай партыі.
Сяргей Крот belsat.eu
