Кітай аднаўляе выдачу ўсіх тыпаў візаў з 15 сакавіка. Пра гэта, паводле агенцтва «Сінь-Хўа», заявіла Міністэрства замежных справаў КНР.
З 15 сакавіка ўсе Кітайскія візавыя агенцтвы за мяжою пачнуць разглядаць і выдаваць розныя тыпы візаў для ўезду замежнікаў у Кітай.
«Пачынаючы з серады, акрэдытаваныя за межамі Кітаю органы, якія ажыццяўляюць выдачу візаў, адновяць выдачу ўсіх катэгорый візаў замежным грамадзянам», – цытуе «Сінь-Хўа» заяву МЗС КНР.
Рашэнне прынятае «ў мэтах далейшага спрашчэння трансмежных паездак». Апроч таго, з 15 сакавіка аднаўляецца дзеянне візаў, выдадзеных да 28 сакавіка 2020 года, у якіх яшчэ не скончыўся тэрмін дзеяння.
Некаторыя вобласці Кітаю вернуцца да бязвізавага рэжыму, які існаваў да пачатку пандэміі. Гэта востраў Хай-Нань і порт Шанхаю, а для падарожнікаў з Гон-Конгу і Макаў – паўднёвы вытворчы цэнтр правінцыі Гўан-Дун.
Кітай ці не адна з апошніх краінаў, якая адмяняе каронавірусныя абмежаванні ў падарожжах. Жорсткія антыковідныя захады «палітыкі нулявой цярпімасці» ў КНР дзеялі тры гады, аж да пачатку студзеня 2023 года, калі іх пачалі адмяняць, што выклікала рост актыўнасці ў эканоміцы.
11 сакавіка споўнілася тры гады, як Сусветная арганізацыя здароўя назвала глабальную ўспышку COVID-19 пандэміяй.
Антон Тачняк belsat.eu
