Намесніца міністра замежных справаў Беларусі Алена Купчына цяпер у Бруселі з афіцыйным візітам.
Чыноўніца правядзе шэраг сустрэчаў з кіраўнікамі еўрапейскіх установаў. «Бакі абмяркуюць шырокае кола пытанняў, якія датычаць узаемадзеяння Беларусі з Еўрапейскім звязам»,- паведамляе прэс-служба МЗС Беларусі.
Між тым менавіта подпіс Алены Купчыной стаіць пад нядаўняю пастановаю адмовіць у акрэдытацыі карэспандэнцкага пункту спадарожнікавага тэлеканалу «Белсат».
Паводле падпісанага 26 сакавіка чыноўніцай дакументу, беларускія журналісты ўжо неаднаразова парушалі заканадаўства, калі супрацоўнічалі з неакрэдытаваным тэлеканалам. Атрыманыя за гэта пракурорскія папярэджанні сталі падставай чарговай афіцыйнай адмовы ў акрэдытацыі “Белсату”.
Алена Купчына з 2006 года выконвала функцыі пасла Рэспублікі Беларусь у Вугоршчыне, а з 2008-га – і ў Славеніі. Спрычынілася да выхаду ў свет у 2007 годзе першага беларуска-вугорскага слоўніка.
