Развітанне з зімою. Беларусы святкуюць Масленіцу


З 11 сакавіка пачынаецца святкаванне Масленіцы. Людзі сустракаюць вясну і пякуць бліны – сімвал Сонца. Масленіца – свята, якое захавалася яшчэ з язычніцкіх часоў. У хрысціянскай традыцыі гэта апошняя магчымасць павесяліцца і добра пад’есці перад пачаткам Вялікага посту.

Раней кожны дзень Масленіцы меў сваю асаблівасць. Напрыклад, у чацвер аб’язджалі маладых коней, коўзаліся на санках з горак. Лічылася, што чым больш будзеш ездзіць, тым вышэйшы вырасце лён. У пятніцу зяці хадзілі да цёшчы на бліны, прычым без сваёй цудоўнай паловы.

Святкаванне Масленіцы на Гарадзеншчыне, фота БелаПАНСвяткаванне Масленіцы на Гарадзеншчыне, фота БелаПАНУ апошні дзень Масленіцы (Даравальная нядзеля) прынята было хадзіць у госці да сваякоў ці збірацца ўсёй сям’ёй у хаце. У гэты вечар шмат у якіх мясцінах Беларусі праводзіўся цікавы і ўрачысты абрад. Пасля вячэры гаспадар садзіўся ў строгім і набожным настроі. А да яго па чарзе падыходзілі браты і сыны, пасля – жанчыны, кланяліся да зямлі і казалі: «Даруй, бацька родны, калі чым саграшыў(-ла) перад табою справаю ці языком». Выслухаўшы ўсіх, гаспадар таксама кланяўся да зямлі ўсёй сям’і, просячы гэткім чынам прабачэння за ўсе свае грахі ды памылкі.

У Беларусі ў ваенныя і пасляваенныя гады святкаванні Масленіцы былі прыпыненыя. Але ўжо бліжэй да 1990-х гэтае свята зноў набыло сваю папулярнасць. Коўзанні на санях, спальванне пудзіла, выпяканне розных бліноў і спартовыя спаборніцтвы – гэтыя і шмат якія іншыя мерапрыемствы штогод праводзяцца ў розных мясцінах Беларусі.

Блін - сімвал сонца. Фота БелаПАНБлін – сімвал сонца. Фота БелаПАНСёлета адзначыць масленіцу можна будзе ў гарадскіх парках культуры і адпачынку. Напрыклад, у «Сілічах» святочныя мерапрыемствы адбудуцца 16 сакавіка. У музеі «Дудуткі» 16–17 сакавіка. Таксама 17 сакавіка ў Паставах адбудуцца гулянні. Розныя аграсядзібы і базы адпачынку Беларусі адкрыюць свае дзверы для тых, хто жадае акунуцца ў святочную атмасферу Масленіцы.

Дзіяна Шыцік, belsat.eu

Глядзі таксама
Каментары