Сакратар Савету бяспекі Беларусі Аляксандр Вальфовіч заявіў пра актывізацыю «разведвальна-падрыўной дзейнасці замежных спецслужбаў у Беларусі». Пра гэта піша БелТА.
«Мы бачым, як узмоцнена зандуецца глеба для пошуку болевых кропак у грамадстве для арганізацыі правакацыяў, здольных разгайдаць сітуацыю», – заявіў Вальфовіч на сустрэчы ў Акадэміі нацыянальнай бяспекі.
Паводле Вальфовіча, «за мяжой пільна вывучаюць розныя сацыяльныя групы». «Спрабуюць зрушыць акцэнт на нагнятанне напружанасці ў працоўных калектывах, ачарненне органаў улады, сілавікоў. Імкнуцца дэстабілізаваць абстаноўку ў краіне, разбурыць маналітнасць сістэмы забеспячэння нацыянальнай бяспекі», – падкрэсліў ён.
Сакратар Савету бяспекі заявіў, што найбліжэйшым часам пачнецца фармаванне Усебеларускага народнага сходу, «а значыць, нас зноў паспрабуюць расхістаць». Паводле Вальфовіча «неабходна быць гатовым да таго, што беглыя і іх замежныя куратары ад спецслужбаў прыдумаюць новыя трыгеры для дэстабілізацыі грамадства». Ён заклікаў не проста рэальна ацэньваць абстаноўку і прагназаваць развіццё падзеяў, але і дзейнічаць на апярэджанне.
Глеб Нержын belsat.eu