Беларуская федэрацыя футбола не змагла падрыхтаваць дастатковую колькасць сцюардаў для працы на матчах зборнай.
Як паведаміў першы намеснік старшыні БФФ Сяргей Сафар’ян, на курс было набрана 45 чалавек, з якіх курс навучання да канца прайшлі 30. Абслугоўваць таварыскі матч з Літвой 8 чэрвеня прыйшло “менш чым два дзясяткі”, хоць “праца не бясплатная”.
Намеснік начальніка ўпраўлення аховы правапарадку МУС Уладзімір Станілевіч паведаміў, што яго ведамства выступіла з заканадаўчай ініцыятывай перад Міністэрствам спорту і турызму аб унясенні змяненняў у закон аб фізічнай культуры і спорце, каб раздзяліць адказнасць органаў унутраных спраў і арганізатараў спартыўных мерапрыемстваў.
Станілевіч адзначыў, што стадыён для балельшчыкаў адкрываецца за тры гадзіны да матчу, але многія прыходзяць за паўгадзіны і імкнуцца абавязкова трапіць на трыбуну да стартавага свістка. “Ёсць паняцці прапускная здольнасць і дакладны надгляд, і адысці ад гэтага мы не можам, таму і ствараецца чарга”, — сказаў прадстаўнік МУС. Ён падкрэсліў, што на стадыёне “Дынама” ўсяго чатыры ўваходы, тады як на “Менск-Арэне” 31 пункт пропуску.
belsat.eu