У Беларусі амаль тры гады штодня затрыманні і суды з палітычных прычынаў. Расказваем, пра якія рэпрэсіі стала вядома за адзін толькі дзень 10 сакавіка.
Міністэрства ўнутраных справаў пужае ГУБАЗіКам: пасля атакі на расейскі «лятучы радар» у Мачулішчах сілавікі на даручэнне Аляксандра Лукашэнкі «актывізавалі працу».
Сілавікі хваляцца: за адзін дзень 9 сакавіка «адпрацавалі звыш 60 асобаў», прыцягнулі да крымінальнай адказнасці пяць чалавек, да адміністратыўнай – 21 чалавека. Шукаюць «ячэйкі экстрэмістаў» і тых, хто «супрацоўнічае з тэрарыстамі».
Па Беларусі пасля 26 лютага, калі ўдзельнікі плану «Перамога» атакавалі дронамі расейскі самалёт, сапраўды ідзе хваля ператрусаў і адвольных затрыманняў.
Пра ператрусы на лецішчах паведамлялі з Бабруйску (там затрымалі Андрэя Сініцу), з Малых Якавічаў у Пружанскім раёне, з Палонкі Баранавіцкага раёну.
Але затрыманні і ператрусы звязаныя, падобна, не толькі з Мачулішчамі.
Так, ператрус правялі таксама ўдома ў бацькоў блогера і былога палітвязня Аляксандра Кабанава.
У Горадні затрымалі фатографа Валерыя Юдзіна, які некалі працаваў у міліцэйскай прэс-службе.
Таксама ў Горадні затрымалі Паўла Якубеля – дзядзьку Карыны Маліноўскай, якая пасля збіцця сілавікамі ў 2020 годзе страціла дзіця, а ў 2022 годзе прайшла трэнаванне BYPOL (яна расказала журналістам «Зеркало», што размаўляла з дзядзькам, але не была ягоным «куратарам»).
У Бабруйску затрымалі і моцна пабілі, як бачна з «пакаяннага відэа», супрацоўніка Цэнтру культуры Вячаслава Аркатава, якога западозрылі ў рэгістрацыі ў плане «Перамога».
У Менску асудзілі былую выкладчыцу МДЛУ і чальца Каардынацыйнай рады Наталлю Дуліну. За «Спрыянне экстрэмісцкай дзейнасці» і «Грубае парушэнне грамадскага парадку» ёй прысудзілі 3,5 года калоніі.
Прысуд палітвязню, былому следчаму Паўлу Юшкевічу пакінулі без зменаў, паведамляе праваабарончы цэнтр «Вясна»: 11 гадоў калоніі ўзмоцненага рэжыму паводле шасці крымінальных артыкулаў, у ліку якіх «Арганізацыя масавых беспарадкаў».
Пачалі судзіць шэраг палітвязняў: Аляксандра Данілевіча, Аксану Зарэцкую і Багдана Караўца, музыкаў гурту «Litesound» і іхных бацькоў. Сталі вядомыя даты судоў над Дзмітрыем Гарбуновым і Паўлам Хакалам. Суд у «справе Nexta» зрабілі адкрытым, там дае паказанні палітвязень Раман Пратасевіч.
Палітвязню Сяргею Ярашэвічу, колішняму адміністратару Telegram-каналу «Армія з народам», нядаўна прысудзілі яшчэ 9 месяцаў зняволення на дадатак да ранейшых 5,5 года калоніі. Цяпер яго, піша «Вясна», перавялі ў калонію № 20 у Мазыры.
Супраць віцебскага праваабаронцы Паўла Левінава распачалі крымінальную справу за «Падрыхтоўку да ўдзелу ў групавым парушэнні парадку», даведалася «Вясна». Левінаў за мяжою, яго прасілі прыехаць на радзіму на допыт.
У палітзняволенай Алены Гнаўк, якая чакае суду паводле новай крымінальнай справы, пагоршылася здароўе: былая адвакатка расказала «Вясне», што Гнаўк «моцна схуднела, у яе трасуцца рукі».
«Пакаянныя відэа» цяпер публікуюць не толькі сілавікі, а і дзяржаўнае інфармагенцтва «БелТА». Раней такія відэа з’яўляліся толькі ў тэлеграм-каналах прапагандыстаў і сілавікоў, гэтыя каналы часам блакавалі пасля скаргаў карыстальнікаў на прапаганду гвалту.
У «спіс экстрэмістаў» Міністэрства ўнутраных справаў дадалі яшчэ 28 чалавек – цяпер там 2531 імя. У спісе палітвязняў, які вядзе «Вясна», цяпер 1451 чалавек.
Але ёсць і ўмоўна добрыя навіны. На волю выйшаў палітвязень Іван Кузюр, які адбыў два гады ў калоніі за «Абразу прадстаўніка ўлады». А прадстаўніца «Вясны» Наталля Сацункевіч выступіла на сесіі Арганізацыі аб’яднаных нацыяў.
Алесь Наваборскі belsat.eu