Сусветнавядомы брытанскі гурт «The Rolling Stones» выпускае першы за 18 гадоў цалкам арыгінальны альбом – пасля «A Bigger Bang» 2005 года. Пласцінка пад назвай «Hackney Diamonds» (пер. «Брыльянты Хакні») павінна выйсці 20 кастрычніка.
У Лондане ўдзельнікі гурта прадставілі першы сінгл «Angry», а таксама кліп на яго.
Прэзентацыя кліпу на сінгл «Angry» транслявалася на YouTube.
«Гэта сапраўды глабальны момант, якім мы хочам падзяліцца з прыхільнікамі па ўсім свеце праз YouTube», – паведамілі «The Rolling Stones» перад прэзентацыяй.
Таксама вядома, што ў альбом увойдуць матэрыялы, запісаныя пры жыцці нязменнага барабаншчыка гурта Чарлі Уотса, які памёр у 2021 годзе.
«The Rolling Stones» – брытанскі рок-гурт, які ўтварыўся ў 1962 годзе і лічыцца адным з самых уплывовых і паспяховых гуртоў у гісторыі року. Гурт выпусціў 23 студыйныя і 8 канцэртных альбомаў, а агульнасусветны тыраж альбомаў перавысіў 250 мільёнаў, 200 з якіх былі прададзеныя ў ЗША. «The Rolling Stones» уключаны ў Залу славы рок-н-ролу і займае чацвёртае месца ў спісе «50 найвялікшых выканаўцаў усіх часоў па версіі часопіса Rolling Stone».
Алена Рувіна belsat.eu
